Abuso di mucha ta un topico cu lamentablemente ta keda relevante y actual na Aruba, na unda e dianan aki e discusion pa e tema a bin dilanti un biaha mas pa loke a sucede recientemente den un crèche cu a haya basta atencion. Sinembargo, tambe ta importante pa trece dilanti e topico di abuso sexual di mucha cu keto bay, nan historianan y kehonan no ta disminui manera Stichting End Child Abuse “Ta Basta” ta señala.

Manera ta conoci Stichting End Child Abuse (S.E.C.A) “Ta Basta” ta un organisacion cu a ser funda na aña 2020 pa denuncia casonan di abuso sexual, nan a organisa un manifestacion pacifico dia 3 di juli di e aña ey y nan a entrega un manifiesto cu 18 punto na ex-presidente di Parlamento di Aruba, Ady Thijsen na e momento ey.

E tempo ey, nan a sinta cu ex-minister Andin Bikker, encarga cu Husticia y minister Glenbert Croes cu cartera di Asuntonan Social, ademas di otro reunionnan cu a tuma luga cu instancianan di lo cual te awendia manera nan ta sigura, nada a ser haci.

Den e di dos carta entrega dia 6 di augustus di e mesun aña nan a haci un invitacion na tur instancia pa un “Town Hall Meeting, dia 4 di september a entrega e di tres carta cu e di dos manifiesto cu 21 punto conhuntamente cu un carta di “Drive by”, 1 di april 2021 a bay e 4 carta cu “Lopende Zaak” conhuntamente cu e manifiesto cu 21 punto y e carta di 6 augustus 2020, dia 15 di juni 2021 a entrega e di cinco carta tocante e 3 forma di “Screening” cu nan tabata desea di wak.

Y finalmente e di 6 carta a bay na Gobierno y Parlamento di Aruba dia 25 di november di aña 2021, nan ta señala cu nan a ricibi un yamada dia 29 september 2021 pa reuni cu minister di Husticia y Asuntonan Social dialuna 4 october 2021.

S.E.C.A a manda varios carta y tambe manifiesto pa Gobernador, Parlamento y Gobierno, nunca nan a ricibi un reaccion, segun nan ta señala.

Ultimo formador a notifica nan cu e no a ricibi nan manifiestonan y tur nan documento tin stempel di “ontvangst” y a ser registra y manda via BIT.

 

“Si di berdad minister di Husticia y Asuntonan Social tin respuestanan riba nos puntonan di ley, maneho y instancianan nos lo aprecia si nos por ricibi nan y asina nos por controla kico di berdad a cambia,” nan ta señala.

Nan ta considera cu tin fout no solamente den gobernacion sino tambe den parlamento, pa motibo cu gobierno ta priminti y parlamento mester defende pueblo, “bo no ta kere cu e tema aki mester haya atencion? Wak ta cuanto caso di abuso sexual tin, nos di S.E.C.A.

Reaccion di minister Rocco Tjon: “nos porta semper ta habri pa nan”

Diaranson ultimo, Bon Dia Aruba a puntra na minister di Asuntonan Social actual, Rocco Tjon, cu gobierno a priminti haci un reunion riba topico di abuso sexual di mucha y esey no a tuma lugha, cu a bin cu un hoorzitting y kico a sali afo?

Pa esaki, minister Tjon a expresa cu “esey no ta cuadra cu e berdad, mi sa di na unda e pregunta ta bin tambe, nos a invita e organisacion aki den cuestion, hopi biaha pa nos intercambia cu nan pero nan semper a nenga e invitacion aki, mi tin tur e cartanan y invitacion cu a bay, mi ta lamenta cu riba un topico asina importante un fundacion asina ta trata di hunga politica, tabatin diferente reunion na parlamento na fin di april cu tabata e luna cu a ser decreta pa duna mas atencion na e fenomeno aki, mi mes tabata den parlamento cu full e veld social y cada departamento a splica specificamente kico ta ser haci pa combati abuso di mucha. Di e banda aki, keto bay, e invitacion t’ey pa e organisacion en cuestion aki, si nan kier informacion of si nan kier intercambia idea cu mi persona, cu e gabinete of cu e trahadonan, nos porta semper ta habri pa nan,” el a bisa.

S.E.C.A ta haya sa di casi 30 caso di abuso pa luna

Ademas S.E.C.A a informa cu pa luna nan a haya entre 15 pa 20 caso di abuso sexual den nan inbox riba rednan social, na caya 6 of 7 caso aparte “pero no ta tur caso nos ta post riba media pasobra e victimanan mes ta pidi nos pa no haciele door cu e ta trece cierto sentimentonan pa nan, ademas cu e victimanan no tin confiansa den e sistema, p’esey nos ta urgi nan pa toch bay haci denuncia, pero victimanan tambe ta consciente cu den Landspakkete Hulanda no a aproba mas placa pa e pakete social y Hulanda no a kere den e Sociaal Crisis Plan cu nan a gasta miyones den dje, dus kico ta pasa cu hopi departamento a ser disminui y hopi di e trahadonan tabata support e partido y nan a duna nan e trabou, pero cuanto di nan ta cualifica pa e trabou? Nan a indica.

Nan ta apoya e Family Justice Center e cual ta bay ta ubica conhuntamente cu Jeugd en Zeden politie y Bureau Slachtofferhulp y cu ta den construccion na e momentonan aki pero nan ta di opinion cu e ta tardando pa habri.

Como un organisacion dedica na prevencion di abuso, nan ta splica cu den tur caso ta hopi duro pa convence e victimanan pero toch nan ta sinta y papia cu nan , “nos ta pro pa haci e denuncia.”

Pa finalisa, S.E.C.A ta trece dilanti cu nan meta no ta pa ta den guera cu gobierno, ni cu ni un otro instancia, nan ta compronde cu JZP tambe mester di mas hende y material, “e grupo no a lanta pa den guera cu nan, el a lanta pa ta den guera cu e pedofiel pero e ta duel nos cu un gobernacion cu ta bay haci 8 aña ta bisa nos cu nan tin e solucion den 6 minuut, nos a entrega 6 carta, nan sa kico e problema ta, pero ainda bo no por reuni? Bo por yama nos, pero nos a manda boso 6 carta, kico mas bo kier pa nos papia cu boso? Ki dia Parlamento di Aruba ta bay haci e reunion publico? Duna prioridad na e topico aki mescos cu boso a haci cu otro topiconan.”

 

Comunidad tambe mester