Stichting Bloedbank cu campaña pa mas hende bira donante

Sigur bo tambe a mira e posternan. Posternan cu un nomber y su tras ta bisa: “is a lifesaver”. Hopi hende tabata puntra nan mes kico esey tabata kiermen; “di con e hendenan aki ta salbado di bida?”, “di unda e campaña aki ta bin?”. Despues cu a pone potret di e posternan aki riba e pagina di Facebook di Stichting Bloedbank Aruba, un ke otro ya a

bira un poco mas cla. Y desde di awe nos ta conta ful e storia.

Ta trata aki di dunadonan di sanger di Stichting Bloedbank Aruba. Nan ta lifesavers. Nan ta duna nan sanger na un baby cu a nace prematuro, na un hende cu tin cu recupera di un operacion o un persona cu a perde hopi sanger den un desgracia. Un dunando no sa na kende e ta duna sanger, pero semper e ta sirbi un bon causa; salba un bida. Stichting Bloedbank Aruba tin como 1700 dunando, pero pa Aruba esey ainda ta poco. E presion riba e dunadonan aki ta grandi. Nan ta duna sanger 3 pa 4 bes pa aña, na luga di e averahe mundial cu ta 1,5 bes pa aña. Segun World Health Organization 5% di e poblacion lo mester ta dunando. Esey kiermen cu na Aruba ainda mester bin 3100 dunando acerca pa por cumpli cu e demanda pa sanger.

“Pa medio di e campaña aki nos kier recluta salbadonan di bida nobo. Pero e enfoke ta riba calidad y no cantidad,” segun Sr. Raymond Maxwell di Stichting Bloedbank Aruba. “Pa por garantisa e calidad di e sanger, bo tin cu pasa dor di un cantidad di test medico. Sanger sano ora di transfusion ta importante, pero pa e dunando tambe ta bon pa sa cu e ta bon di salud.” E campaña a cosecha hopi reaccion te cu awor. Pa medio di Facebook ta tag lifesavers di bida y nan famia y e potretnan di e posternan ta haya hopi ‘likes’. Tin biaha ta tende e critica; ‘unda mi poster a keda?’ Nos tabatin un presupuesto modesto pa e campaña aki, di modo cu nos mester a haci un seleccion. No ta tur dunando a haya su propio poster, pero otro aña un otro grupo lo wordo poni den spotlight y asina nos ta sigui.

Stichting Bloedbank Aruba a crea den tur caso un “buzz” cu e campaña aki. E siman cu ta bin, Aruba lo mira mas testimonio di otro lifesavers. Cu potret di e dunadonan y e motibo pakico nan ta scoge pa ta dunando. Nos kier gradici nos lifesavers di bida actual. Nan ta duna nos algo di balor. Sanger ta algo cu bo no por cumpra unda cu ta. E ta bay di hende pa hende y esey ta haci e algo hopi special. Bo tambe kier bira dunando? Yama 587-0002 of yena e formulario riba www.bloedbankaruba.org. Of check nos pagina riba Facebook.