Stichting Avondonderwijs kier bay riba enseñansa virtual pa sigui yuda studiantenan adulto

Durante un conferencia di prensa di e diferente reunionnan cu stakeholders y formado prome minister demisionario Evelyn Wever-Croes, Stichting Avondonderwijs Aruba a expresa cu nan a duna un splicacion di e puntonan cu ta hopi importante cu nan tin, entre nan e plan anual cu no a wordo aproba.

Juffrouw Ginny Croes a menciona cu ultimo aña door di Covid-19 nan tin basta tempo cu nan no a sinta cu minister demisionario di Enseñansa Rudy Lampe lo cual nan a haci ayera pa por conta nan preocupacionnan na minister Lampe.

Di algun puntonan cu nan a trece dilanti, tabatin esun di losse uren beleid, cu segun el a sigura ainda nan no a haya un contesta por escrito for di minister Lampe, tambe el a trece dilanti cu nan a papia tocante e plan anual cu nan a entrega y cu no a wordo aproba, pa wak kico nan tin cu haci cune pa cambi’e den sentido cu e no a wordo aproba pa minister Lampe y nan kier haya sa kico ta e motibonan y con nan por yega na un plan cu si lo wordo aproba.

Nan deseo ta pa e esey por wordo aproba pa motibo cu segun Nathalie Wever director di Avond MAVO Aruba den dje tin hopi cosnan bunita cu nan kier haci pa onderwijs como por ehemplo cu nan kier bay den forma digital, awendia nan ta den klas so y avondonderwijs ta trata cu adultonan na unda hopi biaha nan ta trahando y no por ta presente den e les y pa e motibo aki nan kier haci’e enseñansa mas accesibel.

Nan ta haya esaki hopi importante pa motibo cu nan plan a wordo traha cu begeleiding di onderwijs, e departamento mes a yuda nan pa trah’e na base di e Plan 2030 y cu pa nan tabata manera un sorpresa cu no a wordo aproba pero cu nan semper ta dispuesto pa sinta y pa wak na unda nan por mehora, di e manera aki nan a sigura cu por yuda tur e adulto cu kier sigui avondonderwijs, asina mes el a expresa cu aña pasa nan tabatin un cantidad di 800 studiante di avond cu mavo y avond cu havo.

“Avondonderwijs nan ta kere cu ta un scol chikito y den total tin 800 studiante lo cual ta bastante y sigur nos lo kier mehora y wak di un otro manera con nos por yuda Aruba den general”, Wever a declara.

Tambe, el a sigura cu e plan ta mas grandi pero esey ta un di e puntonan cu nan lo kier enfoca mas, tin otro puntonan cu tin mas prioridad pero nan no kier a elabora mas den dje durante e conferencia di prensa aki.