Durante e ultimo siman por a lesa den diferente medio di comunicacion y rednan social cu un di e ultimo 2 Pal’i Sia Cora cu tin na Aruba cu ta proteha pa ley, lo a keda kita di tereno destina pa traha un cas di oracion (moskee) na Sabana Basora. Tambe a keda indica cu esaki a keda haci sin “Aanleg Vergunning” y pa e motibo aki Stichting Aruba Islamic Foundation lo mester ricibi un multa.
Segun e comunicado cu Bon Dia Aruba a ricibi, ta bisa cu esaki ta keda un noticia lamentabel, ya cu e mata aki ta proteha y segun e noticia, ta solamente 2 so tin na Aruba. Pa Stichting Aruba Islamic Foundation ta necesario pa trece claridad tocante e sucedido, ya cu e informacion aki ta uno incorecto. Tin 2 punto importante cu mester wordo aclara:
1. E fundacion a ricibi oficialmente e tereno dia 14 di mei di 2019 y a traha di cerca cu diferente departamentonan gubernamental pa sigui tur e pasonan stipula y di e manera aki, por a haya tur e permisonan necesario pa cuminsa e construccion. Na ningun momento e departamento encarga a informa e fundacion cu lo mester a busca un permiso pa asina haci e tereno limpi y ta ora cu e noticia aki a keda publica, e fundacion a haya sa di esaki.
2. E fundacion a ricibi e tereno na Sabana Basora parcialmente limpi (rosa), unda cu por a wak diferente tipo di sushi bieu riba e luga specifico unda e noticia a bisa cu e Pal’i Sia Cora lo tabata ubica.
Despues cu e fundacion a haya sa tanto di e “Aanleg Vergunning” y di e Pal’i Sia Cora cu a ser rosa, e fundacion a acudi (boluntariamente) na tur e departamentonan gubernamental un biaha mas y a haya sa cu berdad e departamento concerni mes lo a aplica p’e permiso pa e fundacion, pero pa algun motibo of otro, nan no a menciona nada di esaki na e fundacion y pa e motibo aki ningun persona no tabata sa di e permiso.
Cu e declaracion aki, miembronan di e fundacion a presenta na OM cu diferente prueba (video & potret saca cu drone na e momento di a ricibi e tereno) y demostra nan inocencia pa cu e acto aki. Cu e evidencia nan por a demostra cu e Pal’i Sia Cora menciona no tabata riba e tereno ora cu e fundacion a ricibi esaki y pa e motibo aki e fundacion no a ricibi ningun multa.
Stichting Aruba Islamic Foundation ta un fundacion cu a ser lanta na aña 2012 cu e intencion di facilita un cas di oracion (of Moskee ) pa tur e Muslim na Aruba, tanto pa e yiunan di tera y tur esunnan cu ta biba na nos dushi Isla pa mas di 40 aña. Un peticion oficial pa un pida tereno a ser haci na gobierno door di Centro Islamico Aruba for di aña 1998 y aunke el a wordo aproba, ta te na mei di 2019 esaki a bira un realidad.
Cu e mensahe aki e fundacion ta desea di por a aclara e sucedido y di biaha kier garantisa cu lo tuma parti den e proceso di proteccion y cuido di flora y fauna cu tin, tanto riba e tereno, como e area rond di dje.
