Stichting Adopt An Addict tin 9 aña di existencia y nan trabou no ta facil. Igualmente nan tin necesidad di fondo pa sigui opera y asina rescata e adictonan fei gara di droga. Nan no por haci fiesta caminda tin consumo di alcohol ya cu esaki tambe ta un tipo di droga cu ta permisibel den nos comunidad. P’esey nan a bin cu un rifa pa colecta fondo cu ta wordo destina muy particularmente pa e mantencion di Cas Speransa.
E fundacion aki ta ricibi ayudo of subsidio di departamento di Asunto Social pa e adictonan por haya tratamento afo, pero pa e mantencion di e Cas Speransa nan no ta haya niun sorto di subsidio di gobierno. Cas Speransa ta e caminda cu nan ta hinca e adictonan ora cu nan ta bin bek for di Santo Domingo y nan mester integra bek den comunidad. Evelyn Arends ta un trahado boluntario encarga cu Cas Speransa hunto cu Osiris Frias cu ta e director di e cas cu ta un half way home.
E intencion di e fundacion aki ta cu via e rifa aki nan por recauda mas fondo cu ta posibel ya cu pa pone draai un cas asina, manera cualkier otro cas, nan mester di placa pa tur cos por funciona bon. “Tur cos ta caro, tur cos ta costa hopi cen y hendenan aki mester tin un bon calidad di bida pa nan custumbra y pa nan sigui asina…”, el a declara.
Actualmente e cas aki tin un capacidad maximo pa 20 cliente, aunke e cantidad di cliente tin biaha ta fluctua. Tur cos ta depende di e hendenan cu ta bin y esunnan cu ta bay despues di cumpli cu un proceso di socialisacion. Nan tin hende cu ta yega y keda, pero despues cu nan ta haya un trabou y nan ta socialisa exitosamente, nan ta bay. Den caso cu nan ta confronta algun problema afo, nan ta bin Cas Speransa ya cu nan ta considera como un safe point. Tin algun di nan cu ta cay bek den consumo di droga, pero no ta hopi, segun sra. Arends
E ta splica cu e hendenan aki cu ta bin bek mester haya un guia cu ta fungi como nan mayornan. E luga aki tin reglanan riba diferente funcion y responsabilidad, manera cualkier famia, pa crea un disciplina cerca nan. Nan ta crea un ambiente familiar pa e adicto rehabilita por busca un trabou y integra nan mes na comunidad.
Sra. Arends a bisa cu nan tin cliente cu no por funciona den otro trabou mas. E ta un grupo masha chikito, mientras cu e grupo mas grandi ta esun cu ta drenta y bay pa integra na comunidad.
Nan ta percura pa mantene nan activo ya cu tin algun di nan cu no ta traha. Pero tin otro cu ta traha henter dia, pero despues ta bay bek den e cas aki. E hendenan cu no tin trabou ta keda den Cas Speransa y nan no ta manda nan riba caya pa evita cu nan por cay bek den adiccion.
“Nos no ta haci un proceso asina largo di pone un hende bira clean anto despues pone ariba caya si no tin caminda di bay”, segun sra. Arends. Ademas nos comunidad no tin otro luga pa tuma nan y pa tal motibo nan mester keda na Cas Speransa, te ora cu nan por haya un trabou. Nan a cuminsa cu un proyecto di agricultura pa nan por haci entre otro esey, pero tambe nan tin otro tareanan pa mantene e cas.
