(AP) – Un prototipo di Apple-1 Computer di añanan 1970 a ser bendi na un subasta pa casi 700,000 dollar.
E prototipo a ser usa pa Apple su co-fundador Steve Jobs den aña 1976 pa demostra Apple-1 na Paul Terrel, e doño di The Byte Shop na Mountain View, California, un di e prome tiendanan di computer personal mundialmente, RR Auction basa na Boston a bisa den un declaracion.
Un colector di Bay Area ken ta desea di permanece anonimo a haci e oferta gañado di 677,196 dollar riba diahuebs, e agencia di subasta a comenta.
“No tin Apple-1 sin esaki, e ta lo mas preciado di Steve Jobs y Apple,” Bobby Livingston a expresa, ken ta vice presidente di RR.
E prototipo aki a ser mira den potretnan saca cu camara Polaroid di Terrel den aña 1976, unda cu por a mira e prototipo aki den uso. Tambe el a ser examina y confirma di ta autentico pa experto Corey Cohen di Apple-1, ken a notarisa un reportahe di 13 pagina cu a compaña e benta.
E prototipo aki tabata warda riba propiedad di Apple Garage pa varios aña prome cu esaki a ser duna na un bendedor pa Jobs mas o menos 30 aña pasa.
