(TMZ) – Strea di e programa di mucha conoci ‘Blues Clues’ Steve Burns a recorda un memoria profundo ora cu un sobreviviente di cancer a bishita su persona na un convencion, mirando cu aparentemente nan a conoce otro 2 decada atras danki na e fundacion Make-A-Wish.
Brandon Ragland a conta TMZ cu e tin mas di 23 aña den remision y recientemente a conecta cu Steve na Steel city Con na Pennsylvania, mas o menos 22 aña despues cu nan a conoce otro bao circunstancia diferente.
E ta algo hopi bunita. Brandon a conta cu el a cana acerca na Steve su mesa, a duna e actor un man y a saca e potret di aña 2000, tempo cu Steve tabata e soño di un mucha, y na e momento ey tur cos a conecta pa Steve, ken su wowonan a briya y a bisa “mi ta corda esaki! Y abo tambe!”
Brandon ta bisa cu Steve a conta su persona un storia tocante nan prome encuentro na Serendipity 3 NYC. Brandon tabatin 4 aña, conociendo su actor di television favorito y Steve ta corda cu Brandon tabata un mucha leuk cu tabata core rond di henter e restaurant.
Durante nan reunion, Steve a pidi Brandon pa un potret nobo hunto, y ambos a cuminsa yora. Esaki ta di compronde, mirando cu Brandon tabatin cancer den e tapa 4 den su pulmon y riñonnan ora cu nan a conoce otro, y awe tin 25 aña cu su propio famia. Brandon a sigui conta cu Steve a dune un brasa y a expresa “esaki ta e miho momento di henter e aña y mi ta asina contento cu bo ta aki.”
Desde e dia aki, nan a mantene contacto riba rednan social y Steve a laga cla con orguyoso e ta cu Brandon awo ta un tata saludabel y un bon casa.
