Den cuadro cu dia di bestia, Bon Dia Aruba a bishita Animal Shelter kende a informa nos di nan Aruba Dogshow 2017 cu lo bay tuma luga e luna aki.  Tambe nan a bolbe subraya e parti di conscientisacion riba sterilisacion y bestianan cu ta muri den e ‘kill cage’ di Wayaca.

Manera cu nos a publica mas trempan den e aña aki, den e ‘kill cage’ na Wayaca, mas o menos 8.000 pa 10.000 bestia ta wordo mata pa aña. Cada cacho cu ta keda rescata di caya of di un doño iresponsabel, ta costa entre 300 te 500 florin. Esaki ta pa cubri vacuna, sterilisa, antibiotica y mas. Manager di Animal Shelter, Eva Herry, ta conta Bon Dia Aruba cu e aña aki a bay hopi trankil cerca nan pa via di e malesa di distemper. Nan a haya hopi problema cu esaki na cuminsamento di aña, caminda ningun cacho por a keda vacuna y hopi puppies a bira malo. Sra. Herry ta conta nos cu e shelter ta hopi yen actualmente, cu mas o menos 50 cacho cu nan ta cuidando.

“Mi ta kere cu hopi hende no sa kico nos ta haci akinan. Ora nan ta adopta un cacho of pushi akinan, nan ta haya un pakete”, e ta bisa. E pakete aki ta inclui tratamento di sanger pa carpata, sterilisacion of capa e bestia. Ta haci nan limpi y si nan tin problema cu cuero nan ta haya remedi pa esaki. Organisacionnan cu tin añas ta bringa pa derechonan di bestia na Aruba, ta señala tambe cu e ciudadano mes tin un responsabilidad pa cumpli cu ne. Si cuminsa sterilisa bestianan, e cantidad di bestianan cu ta bay perdi riba caya of mata den e kill cage naturalmente lo baha.

‘Kill cage’ no ta parti di shelter
Un otro punto cu ainda hopi hende no ta compronde, ta cu e ‘kill cage’ na Wayaca unda hende por laga nan bestianan indesea no ta pertenece na Animal Shelter. Esaki ta algo totalmente separa for di Animal Shelter pero toch hopi hende ta keda link nan na otro. Tin e mesun tipo di sistema aki na otro parti di Norte America tambe, unda por ehempel cu pa dia nan ta pone 7400 bestia drumi. Esaki ta algo cu gobiernonan ta implementa pa e control di un depopulacion di bestia riba un pais. Esun na Aruba ta opera na mesun manera. Esaki y mas informacion por lesa riba blog di Rachel Brathen (For the Love of Animals, 24 juli 2015) kende tambe tin un fundacion pa rescata bestia y a yuda hopi bestia na Aruba conhuntamente cu otro hendenan.



Turistanan ta haci donacion mas tanto
Animal Shelter ta haya hopi donacion mas tanto di turistanan di Merca of Canada. Hopi di nan ta bin cu cos di hunga pa cachonan, treats of djis laga placa pa nan. Nos a yega di reporta riba esaki tambe un biaha den un entrevista cu Anouk Raaphorst, tambe un experto den e tema aki cu a rescata varios bestia hunto cu team di Animal Rescue. Den e entrevista cu nos a haci cu ne algun luna pasa, el a subraya riba e cantidad di cacho na Aruba cu mester baha. “Si tur hende ta yuda y bira responsabel pa su mesun bestia, e problema aki por wordo soluciona. E responsabilidad no mester cay riba e gruponan di rescate ni tampoco riba gobierno.

Cada ciudadano mester cumpli cu su parti,” sra. Raaphorst a splica Bon Dia. Rescate di bestia ta un gasto enorme anto segun el a bisa, tanten cu hende no cambia nan manera, cos no lo cambia aunke cu bo habri dies shelter mas. “Si bay rescata cuater puppies di un cas – nos ta bay gasta 1200 florin riba nan. Cu e gasto di 200 florin pa sterilisa e mama, nos por a evita e puppies di nace y spaar 1000 florin. Cu e placa aki bo por sterilisa 5 otro cacho.”

Aruba Dog Show 2017
Despues di algun aña, e shelter a organisa un dogshow atrobe cu lo ta na Rancho Villa Floralina.
Esaki ta bay ta riba diadomingo 29 di october cumisando pa 4’or di atardi te cu 9’or di anochi.
Esaki lo ta habri pa tur cachonan. Antes e tabata pa tur cachonan crioyo, pero aworaki Animal Shelter ta bisa cu esaki ta habri pa cachonan di rasa tambe. Tin tres categoria: beauty, obedience & tricks. Ta pidi 10 florin pa inscribi un cacho cu mag participa den tur tres categoria. Durante dia tambe lo tin tin algun otro actividad, cosnan pa come y un skina pa muchanan. Animal Shelter tambe ta coordinando cu e K-9 Unit pa nan bin cu un show di cacho di polis riba e dia aki.