Stephanie Danica Maria Quant ta un hoben di 15 aña di edad cu desde un edad hopi jong a cuminsa su trayectoria den mundo di musica. Den un entrevista cu Bon Dia Aruba Stephanie ta conta di su mes, su comienso den musica y su metanan pa futuro.

Stephanie su hobby principal ta musica. E ta toca y ta siñando 8 pa 10 diferente instrumento. Recientemente el a logra su titular como canta-autora na e edad di 15 aña. Otro hobby cu Stpehanie tin ta baile, y esaki, el a conta, ta bin di su tata.

“Mi tata semper tabata wak Michael Jackson y ora mi tabata chikito, mi a purba di copia su movimentonan y mi ta pensa ta esey a yuda mi haya e coordinacion y fluho di baile cu mi tin awo,” el a bisa.

Stephanie ta activo tambe den deporte. E ta practica coremento, tabata hunga basketball, ta gusta hunga badminton y volleyball den su tempo liber cu su amiganan, y a hasta competi den competencia di fencing.

Stephanie a subi escenario pa prome biaha na aña 2013 pa festival di Voz Escolar na Entertainment Center, pero p’e musica semper tabata parti di su bida. El a conta cu su ruman grandi Priscilla, tabata canta y tabata participa den festival di Himno y Bandera, Carnaval y Dande hunto cu Upgrade Music.

“Ami a lanta ta wak e canta y train, y mi mes tabata canta secretamente patras. Awor, mi ta haci mesun cos, menos e parti cu tur hende conoce mi como cantante awo. Te ora cu mi bira grandi, mi sa cu, sea e ta musica internacional of musica cultural di Aruba, musica semper lo ta parti di mi. Tur caminda cu mi bay mi lo mustra cu e musica di Aruba semper ta e raiz di mi musicalidad,” el a expresa.

Contando ken tabata su inspiracion pa drenta den e mundo di musica, Stepahnie a splica cu na prome lugar ta su ruman Priscilla. El a sigui conta cu di ora su ruman tabata chikito semper e tabata participa y a la logra hopi tambe, p’esey mayoria di su logronan Stephanie ta dedica nan na su ruman.

El a indica cu ainda e tin dos meta cu e lo kier logra den festival, y si cu Dios kier e ta logra nan pa e por cera e era di su prome etapa como cantante, musico, y como un mucha hoben.

Stpehanie a agrega cu su mayornan tambe ta su inspiracion. “Danki na mi tata mi a siña con pa ta fuerte y resiliente den tur loke mi haci, y danki na mi mama pa tur e sabiduria y amor cu mi a siña duna y mustra,” el a expresa.

Otro inspiracion pa Stephanie ta e trofeonan den su camber y cashi, full rond den su cas. “Tur caminda cu mi bay esey ta corda mi di tur e añanan cu mi a dedica na canto, tur e obstaculo cu mi a pasa aden, y tur e esfuerso cu mi a haci pa mi por a desaroya e diferente talentonan cu papa Dios a duna mi,” el a agrega.

Pa loke ta su metanan pa futuro, kico cu e ta, musica sigur lo forma parti di dje. El a conta cu e tin plania bay studia afo, y regresa Aruba como un profesional. Actualmente su materianan preferi ta scheikunde, wiskunde B y natuurkunde. Su plan ta pa studia ‘Sustainable engineering’ y ‘Environmental engineering’.

El a sigui conta cu su meta lo ta pa desaroya y crea sistemanan nobo pa deshaci di sushi, materialnan cu no ta usa mas, y mas problema pa medio di ingenieria ora mi e bek Aruba.

Otro materia faborito di Stephanie ta geschiedenis. El a conta cu esaki e lo kier studia ley y bin bek como huea of abogado.

Y naturalmente e lo kier studia musica tambe, pa e por cuminsa traha como musico y cantante ora e bin bek Aruba. “Cu tur e habilidadnan aki, mi lo kier bira un embahadora di Aruba un dia. Ainda mi ta pensando cua; mi lo kier logra prome, pero mi ta convenci cu mi trabou como embahadora ta skirbi den mi storia caba,” el a sigura.

Por ultimo, Stephanie su mensahe pa e hobennan di Aruba: “Mi mensahe lo ta pa bay p’e, no ta tur cos lo ta perfecto, pa nos por gana den futuro, nos mester siña con pa perde. Pa nos logra nos metanan, si nos traha p’e aunke tin obstaculo. Nos mester keda cu mente positivo pasobra semper positivismo ta gana y nos trabou duro lo cay venci. Y tanten nos ta kere den nos mes, nos por logr’e. Pasobra si bo por imagin’e bo por logr’e.”