Faltando menos di dies dia pa eleccion 2021, tin personanan den comunidad di Aruba cu te ainda nan no a eligi e candidato politico pa e cual nan ta bay vota dia 25 di juni.

Pa cu esaki, Bon Dia Aruba a tuma contacto cu Deon Bisslik y Lorenzo Fränkel miembronan di e proyecto Stemwijzer Aruba 2021 di votaruba.org, cu ta un colaboracion entre stichting Fuente y ProDemos di Hulanda.

Nan a conta cu nan ta un grupo di studiantenan Arubiano cu tin varios aña bibando na Hulanda y nan a lanta un fundacion cu ta yama Stichting Fuente, na Hulanda stemwijzer ta wordo usa den cada eleccion y nan a tuma e idea ey pa asina por wordo utilisa na Aruba y e comunidad por haya un idea di pa ken tin cu vota.

ProDemos ta e desaroyador di stemwijzer na Hulanda y ta traha cu diferente organisacionnan rond di mundo, nan ta esun cu ta encarga di tur e tecnologia di www.votaruba.org, nan ta un fundacion independiente, 100% confidencial y neutral cu tin e meta di informa hende y involucra nan den proceso democratico, na unda privacidad di e votado ta wordo salvaguardia.

Fränkel a destaca cu cuatro aña pasa nan a desaroya e prome stemwijzer pa Aruba na unda esey a wordo utilisa mas cu 11.000 biaha -e cantidad di personanan cualifica pa vota den e ultimo eleccionnan na Aruba tabata 70.000- y ademas nan a trece dilanti cu aunke nan tin nan bida na Hulanda y nan no por vota, nan kier contribui na e bienestar di e isla.

“Nos ta wak kico nos por haci di akinan cu no por vota y no por haci nada, nos a coy e sentido ey y pone den e stemwijzer di Vota Aruba” Bisslik a manifesta.

Door cu stemwijzer a causa un impacto entre e votadonan di cuatro aña pasa y aunke eleccion di e aña aki a wordo adelanta, sinembargo, Fränkel a sigura cu nan no tabata sigur di haci stemwijzer di eleccion aki pero na final nan a dicidi cu esaki ta algo sumamente importante pa bin cune y haci’e.

Di su parti, Bisslik a splica cu e proyecto aki ta un plataforma na unda e usuario ta drenta den e website di www.votaruba.org scoge e idioma entre Hulandes y papiamento y despues nan ta bay na stemwijzer mes.

Stemwijzer ta un sosten brinda pa e votadonan caminda pa eleccion na unda nan a cuminsa cu 70 ponencia en general, e 70 ponencianan aki nan a manda nan na e 12 partido pa nan contesta e puntonan si nan ta di acuerdo of no, of si nan ta neutral y despues nan a pone nan splicacion di pakico nan ta contesta di cierto manera.

Despues di esey, ora cu tur partido a yena nan punto di bista nan a scoge 30 ponencia general, Bisslik a sigura cu tur e ponencianan ey a wordo consulta cu diferente expertonan na Aruba riba di e politica y riba e situacion pa loke ta importante pa trece dilanti.

Tur usuario ta pasa riba e 30 ponencia aki na unda ta pone si ta di acuerdo, no ta di acuerdo of ni un di dos y na final ta scoge cua ponencia ta mas hopi importante, na final di tur e proceso e ta haya un resultado di tres partido cu ta resona mas cu e idealismo of contestanan di e usuario.

Asina mes, Bisslik a menciona cu na cada ponencia e usuario por scoge kico e partidonan ta pensa riba di otro temanan y wak nan splicacionnan.

El a enfatisa cu esaki no ta bisa pa ken e votado ta bay vota, esaki ta conta como un herment pa informa e persona pa asina haci un voto informativo, un voto responsabel segun loke Bisslik a declara, tambe el a bisa cu e meta di stemwijzer ta pa pone usuario bay lesa y informa mas su mes riba splicacion y puntonan di cada partido, wak nan programa di partido tambe, wak e diferente debatenan pa asina informa e votado mes por bay vota responsabel.

Ambos a afirma cu esaki tabata implica hopi trabou door di eleccion cu a bin mas trempan di loke a spera y cu tambe historicamente 12 partido ta participando den eleccion, asina como e buscamento di firmanan, asina mes, nan a haya hopi bon cooperacion cu e partidonan pa cu nan duna y splica con nan ta para riba cada punto.

Di mesun manera, nan a expresa cu nan a haya for di algun votadonan cu nan tabata ansioso wardando pa e stemwijzer di e aña aki “semper un eleccion ta hopi cos ta pasa, hopi cos ta wordo bisa, tin hopi informacion tur caminda y loke nos ta haci ta eigenlijk pone cierto topiconan importante di loke partidonan ta pensa y nos a pone esey den un caminda na unda usuario por haya informacion basta facil” Fränkel a comenta.

Na e momentonan aki cu ta di eleccion, hopi partido y hopi hende por bisa y pinta hopi cos den un forma cu e votado lo aprecia y lo pensa mas miho riba e politiconan pa asina nan completa nan mision na e momentonan aki manera Bissklik a splica, nan mision aworaki no ta pa solamente tin un votado informa pero si despues di eleccion e pagina ta keda habri pa wak kico e partidonan aki a expone pa e resto di e cuatro aña cu lo tin di gobierno.

Loke nan ta mira den eleccion aki ta hopi cosnan interesante cu ta sali for di e debatenan y tambe nan a bisa cu nan ta haya hopi bunita den su grupo cu nan famia tin diferente background politico, den nan grupo tur colornan politico t’ey y nan ta wak nan mes como un generacion nobo, traha hunto sin pensa kico e background politico ta y loke ta uni nan como un grupo cu nan kier lo miho pa nan isla y wak’e bay dilanti.