Stef Blok a bisa… Loke hopi compatriota ta pensa?

E conmocion general den henter Reino pa e expresionnan di ministro di asunto exterior Stef Blok tocante situacion di e sociedad multicultural en general y Hulanda en particular, tabata grandi y comprensibel.

Cu bo ta pensa na e nivel ey como persona ta un cos (cuestionabel), pero pa bo, como ministro di un pais, expresa esey ta nada menos cu absolutamente intolerabel.

Sinembargo, nos no ta mira un renuncia di e ministro, el a expresa caba cu e ta lamenta cu el a expresa su mes asina y posiblemente despues di e reces di parlamento por bin ainda un debate unda e ta obliga di lastra den stof atrobe, pa despues e pais pasa pa orden di dia.

A pesar cu tur gobierno di e islanan den Reino a expresa nan desaprobacion cu su palabranan, e asunto probablemente lo pasa bay, manera un incidente mas. Hasta den e caso cu e partido mas grandi den e coalicion actual na Hulanda bolbe perde un mandatario o secretario di estado, probablemente nan lo tin un proximo candidato pa tuma over. Prome ministro Rutte y su partido a cuminsa parce un gato cu nuebe bida, cu semper ta sobrevivi cualkier contratiempo.

Sin embargo, esaki no mester ta un momento di reflexion pa nos tur? Nos por djis laga e observacion cu Blok a haci, di cual por destila cu e ta haya cu e sociedad multicultural a fracasa, keda colga den aire? Nos no ta referi na e posibilidad di core desmenti loke Blok a bisa, manera awor varios di su coleganan politico ta haci, mustrando riba un cantidad di aspecto positivo di e sociedad ‘nobo’ cu a surgi den ultimo cincuenta aña.

Sin duda tur esey ta berdad, pero esey no por haci cu ta ignora e problemanan grandi cu ta existi den e mesun sociedad ey, cu tin relacion cu e cambionan di un sociedad casi exclusivamente blanco y Europeo, pa un sociedad cu definitivamente no ta esey mas. Ta un caminda tin y esey ta sigui bay dilanti, pero sigui move no ta bay sin reconoce e problemanan cu ta existi. Y si ta esey Blok lo tabata kier a expresa, el a faya completamente.

Pero den tur e consternacion aki, el a papia solamente pa su mes? Nos tin miedo cu no. E hecho cu partidonan manera PVV a surgi ta haci cu partidonan cu ta comparti cierto malcontento cu e sociedad actual multicultural, manera esun na cual Blok ta pertenece, tambe no kier keda atras pa laga e parti di e electorado ey sa cu nan ta consciente y dispuesto di vocifera nan sentimentonan.

Esey no ta haci e problema menos chikito pa esunnan cu no ta comparti e manera di pensa aki y si ta kere cu mester reconoce e realidad di un sociedad multicultural cu mester sigui desaroya den e unico direccion corecto, y esey ta di reconoce derecho di tur ciudadano, independiente di su descendencia, rasa, genero, religion, a base di igualdad.

Aki caba nos ta toca un punto importante cu cual e paisnan Europeo ta luchando grandemente awor. Ora bo ta haya un fluho di dies miles, hasta cien miles y hunto hasta miyones di ciudadano di otro continente ta drenta bo teritorio, ta asina facil pa djis bisa cu nan ta bonbini? Ta asina facil pa djis bisa cu esunnan cu ta opone e aceptacion y integracion di e gruponan aki, cu nan mester stop di ta racista y xenofobo, y siña biba den un pais unda e integracion aki mester tuma luga?

Ora ta trata di gruponan cu ta huy di nan pais pa motibo di guera o hambruna, comprension ta logico, pero ora ta trata di hende cu ta bandona nan pais en busca di un miho futuro, cu no mester teme pa nan bida den nan propio pais, tambe ta logico pa habri porta hancho pa nan?

Kico ta sucede na e momento cu nos, como integrante di un comunidad cu ta multicultural practicamente pa definicion, ta haya nos cu e mesun tipo di fenomeno aki? Nos ta dicidi conhuntamente cu nan tur ta bonbini, of nos tambe ta cuminsa grita cu ‘no hay cama pa tanta gente’? Ta asina cu nos ta parti di un comunidad cu 400 aña di bida multicultural tras di lomba, pero esey ta duna nos e autoridad moral riba esunnan cu ta lidia cu e fenomeno pa 40 aña?

No ta asina cu nos ta defende nos sociedad multicultural, pa esun cu ta parti di e comunidad caba, pero no kier permiti sin mas asalto di afo riba nos biba riba nos isla? No ta berdad cu e sentimentonan menos positivo pa cu hende di exterior cerca nos tambe por surgi di un momento pa otro? Y cu nos por ta, di un momento pa otro, den e mesun debate cu ta tumando luga na Europa actualmente, cu e ministro a vocifera na un manera totalmente kiboca y repudiabel?

Kiboca y repudiabel pasobra el a busca e raiz di e problema den idiosincracia di hende, mientras cu no ta esey ta e problema. Loke e ta sugeri ta bolbe na añanan 1930 na Alemania, na luga di sigui padilanti; esey ta inaceptabel.