Den e reunion publico di Parlamento tratando recorte di 60 miyon florin riba AZV y preocupacionnan di e Asociacion di Fysioterapistanan hopi a comparti nan preocupacion cu preservacion di AZV. E Lider di Fraccion di AVP, mr. Mike Eman, a substancia, cu un cantidad di motibonan fundamental, e necesidad di mantencion di AZV y su principionan di accesibilidad pa cuido, Tambe a pone central e pensamento di solidaridad cu ta parti fundamental di AZV. Den e espirito aki Eman a presenta un mocion pa preservacion di AZV cu a haya sosten unanime den Parlamento.
E mocion ta enfatisa cu te na e momento di introduccion di AZV tabata tin diferencia grandi den e acceso na cuido medico. Promer cu AZV e cobertura tabata leu di completo y esunnan cu mas entrada por a gosa di un seguro medico priva y cuido medico di trahadonan y nan famia tabata basa riba un pp-kaart cu no tabata tin un pakete manera AZV tin awe y tampoco e derecho general como base di accesibilidad. Tabata tin un grupo grandi di ciudadano cu no tabata tin ningun forma di seguro medico.
E mocion presenta dor di mr. Mike Eman a mustra cu seguro medico general (AZV) a wordo crea na comienso di siglo 21 cu e meta pa sigura cu tur ciudadano di Aruba, independiente di su entrada financiero, di su status laboral, di e sector di su trabou, edad o nacionalidad, bou tur circunstancia lo tin acceso na e miho cuido medico cu nos pais ta ofrece. Den consideracion di e mocion ta mustra cu for di comienso tabata conoci cu apesar di e solidaridad di esunnan cu por contribui y esunnan cu no por of por solamente poco, y apesar di e contribucion di tur trahado y dunado di trabou na e fondo di AZV pa medio di primanan mensual, gobierno probablemente lo mester a duna un contribucion adicional na e fondo, pa sigura cu tur ciudadano, trahado y no trahado y nan famia, semper lo ta sigura den forma igual pa e mes un bon cuido medico.
Eman a enfatisa den su discurso presentando e mocion cu e principionan aki pa garantisa cuido medico pa un y tur, cu contribucion di doño di trabao, empleado y gobierno a base di principionan di solidaridad a resulta un formula di gran balor pa e pueblo di Aruba. Pesey e mocion ta conclui cu e decision pa urgi gobierno, den su buskeda pa formanan pa garantisa sostenibilidad di AZV, pa bou tur circunstancia preserva AZV y e principionan di accesibilidad, solidaridad y igualdad, cu semper a forma e base di e seguro medico pa tur na Aruba. Solidaridad di esunnan cu tin e forsa financiero cu esunnan cu no tin pa duna e contribucion necesario na e fondo di AZV. Y igualdad den e acceso na y den e cobertura di cuido medico di tur ciudadano.
E mocion aki presenta pa Lider di Fraccion di AVP, mr. Mike Eman y su fraccion a wordo acepta unanimamente. Es decir cu den tur ehercicio gobierno lo mester tene cuenta cu Parlamento den su totalidad kier preservacion di AVZ y su principionan di accesisibilidad y solidaridad.
