Heliogen, un compania di energia limpi cu a sali di secreto diamars, a bisa cu a descubri un forma pa uza inteligencia artificial y un campo di spiel pa refleha asina hopi luz di solo, cu ta genera calor extremo riba mil grado Celsius.

Esencialmente, Heliogen a crea un forno solar – uno capaz di alcansa temperatura cu ta casi un cuarta parti di locual bo lo haya riba superficie di solo. E avance ta nifica cu, pa prome biaha, energia solar concentra por ser uza pa crea e calor extremo necesario pa traha cement, steel, glas y otro procesonan industrial. Den otro palabra, luz di solo liber di carbon por reemplasa combustibel fossiel den un skina di economia cual no tabata alcansa ainda pa e revolucion di energia limpi.

“Nos ta lansando tecnologia cu por competi cu prijs di combustibel fossiel sin emision di CO2”, Bill Gross, fundado y CEO di Heliogen, a bisa CNN Business.

Heliogen, cu ta conta cu sosten di doño di Los Angeles Times, e biyonario Patrick Soon-Shiong, ta kere cu e tecnologia patenta lo por reduci dramaticamente emision di gas di invernadero di industria. Por ehempel cement ta conta pa 7% di emision global di CO2, segun International Energy Agency.

A diferencia di energia solar tradicional, cual ta uza panel riba dak pa captura energia di solo, Heliogen ta mehorando ‘energia solar concentra’, cual ta uza spiel pa refleha solo riba un punto singular. Sinembargo, den pasado no por a alcansa temperatura suficientemente halto pa traha cement y steel.

Mientras otro companianan di solo concentra a ataca e problema di temperatura agregando steel pa haci e tecnologia mas duro, Heliogen ta uza software di vision di computer, deteccion automatico di margen, y otro tecnologia sofistica pa train un campo di spiel pa refleha rayonan solar riba un punto singular.

Heliogen a bisa cu ta generando asina hopi calor, cu e tecnologia aki por eventualmente ser uza pa crea hydrogen limpi, cual por converti den fuel pa truck y avion.

Awo cu a logra e avance aki, Heliogen lo enfoca riba demostra con por uza e tecnologia na gran escala, manera pa traha cement. “Nos ta den un carera. Nos djis kier escala lo mas lihe posibel”, Gross a finalisa.