Den un ceremonia diaranson atardi a duna e inicio oficial (mira e video ki) pa construi e brug nobo riba Spaans Lagoen. Esaki ta forma parti di e proyecto grandi di Green Corridor, e expansion di e caminda principal di Oranjestad pa Pos Chikito y camindanan nobo paralelo.
Entre otro tabata presente prome minister Mike Eman cu a bisa cu a haci un estudio riba impacto social y ambiental pa full e proyecto aki. Pero no a traha un rapport riba efectonan pa medio ambiente, miho conoci como un MER, director di DOW, Marlon Croes ta splica. Na comienso di e proyecto a haci un estudio berdad manera Eman a menciona. Pero esaki tabata mas tanto tambe pa haya financiamento. Pues riba peticon di banco (Deutsche Bank) mester responsabilisa riba e efectonan.
Croes ta bisa cu despues si a traha riba un MER y 2 siman pasa esaki a keda cla. A punta e director kico ta e resultadonan y si mester haci cierto cambio pa un miho proteccion social/ambiental. Pero e ta contesta cu ainda e no a evalua e rapport. E ora a puntra dicon ya a cuminsa cu e construccion sin sa kico e efectonan lo ta. Croes ta contesta cu a base di e prome estudio lo tene cuenta cu medio ambiente. Por ehemplo pa construi e brug nobo, mester coba den e area di Spaans Lagoen unda tin hopi mangel. E area aki tambe ta proteha bou di e tratado di Ramsar (wetlands), pero esaki ta riba nivel internacional y leynan local no ta duna suficiente proteccion. Sinembargo director Croes ta bisa cu lo no kap mangel, pero hala nan, cuida nan y poco poco planta nan bek.
Den e plannan di Green Corridor tambe ta tene cuenta cu e siguridad y zonido, asina e director DOW ta sigui splica. E speed maximo pa auto ta keda 80 km/ora. Y tambe ta planta mata den un forma cu lo absorba e zonido.
E control riba e construccion y pa evita cu no ta daña naturalesa innecesario, ta den man di DOW y e banco cu ta financia e proyecto. Pero manera Croes ta splica esaki ta mastanto den man di e banco (85%) cu ta manda un experto pa controla riba e aspectonan menciona.
