Awe 27 di september ta Dia Internacional di Turismo e cual tin e obhetivo di conscientisa comunidad internacional tocante balor social, cultural, politico y economico di turismo, pa esaki Bon Dia Aruba a haci diferente entrevista na personanan envolvi den area aki pa asina nan trece nan impresion di kico turismo ta nifica pa nan.

Den su funcion den area di Marketing, Communications, Member Relations, y Activities manager na Casa del Mar Beach and Resort Aruba, Starr Ramos a conta cu el a cuminsa traha eynan for di 2021 y e parti cu mas e ta aprecia di su trabou ta di crea conexion cu hende y laga un impresion riba nan, manera nan tambe ta laga un impresion riba dje.

Manera tur hende ta conoce, turismo ta e pilar di economia di Aruba, pero “hopi hende ta menosprecia kico ta traha den sector di turismo. Trabou den hospitalidad pa mi ta un produccion completo. Como trahado den hospitalidad, bo mester dicidi si bo ta mas un persona cu ta traha dilanti of patras di cortina. Ambos ta mesun importante. E personalnan cu bo no ta wak canando rond ta traha mes duro tras di cortina pa sigura cu tur cos ta cla pa e bishitante prome cu nan yega y durante nan estadia cu nos. Pa mi persona, hospitalidad no ta solamente trata di ta visibel, ta trata tambe di sigura cu esaki ta un transicion sin problema pa e bishitante tin e miho tempo di nan bida cu nos y pa haci esaki memorabel pa nan. Nos tur ta ser humano, cada ken por tin un dia malo, pero ora bo ta traha den hospitalidad nan ta conta cu bo pa laga esaki dilanti porta prome cu bo cuminsa traha,” el a sigura.

Ademas, Ramos a trece dilanti cu “no tur ora ta facil pa haci esaki, pero mi ta sinti cu si bo ta stima bo trabou di berdad y bo tin e pasion pa mehora dia di hende, e lo mester bin naturalmente. P’esey, ta importante pa tur hende cu ta traha of tin pensa di traha den hospitalidad sa si nan caracter ta pas pa FOH (Front of the House) of BOH (Back of the House). Aruba ta ofrece hopi opcion pa bishitante, for di Timeshare pa hotelnan All-Inclusive. Pero mi ta sinti cu locual nos ta haci na Casa del Mar ta diferente.”

Asina mes, a menciona cu recientemente a celebra e 45 aniversario di trabou di un di nan trahadonan cu tabata eynan for di comienso di e hotel, e conoce tur nan miembronan y nan historia, “e ta hopi agradabel pa wak con miembronan ta pasa pa salud’e tur aña y combersa. Esaki ta haci e trabou asina mas personal y satisfecho pa establece e intercambio energetico, conocemento y experencianan. Esaki ta tur loke hospitalidad ta significa pa mi.”