Den hopi articulo mi a expresa mi mes sumamente critico over nos gobernantenan, pero na mesun momento ora cosnan bon tuma lugar tambe mester pone un spotlight positivo riba esaki. E siman cu a pasa nos a wak den dos conferencia di prensa, esta di Minister Glenbert Croes y di Minister Geoffrey Wever e minister concerni a anuncia lo siguiente. Tocante politica di energia, lo kier bin cu un posible financiamento di panelnan solar via ELMAR. E otro anuncio tabata cu Oranjestad lo tin su mesun Incubator yama “OStad Incubator”, cu aporte di universidad di Aruba y un red di partners incluso Vertegenwoordiging van Nederland op Aruba. Tur dos iniciativanan ta di tremendo balor pa Aruba si enberdad bin cu e follow-through priminti.

OStad Incubator:

Den e iniciativa aki, entrepeneurs lo haya aporte na mentorship, luga pa traha na Impact Hub, netwerk, validation di nan modelo di negocia, y te hasta posibilidad pa financiamento. E concepto aki ta algo pa elogia y mi ta contento di wak MinEZ finalmente a tuma mi ideanan na serio pa lansa un concepto asina na Aruba.

E unico tips cu mi lo kier duna ta pa enfoca riba entrepeneurship di Inteligencia Artificial (AI), Energia Solar y Argicultura. Locual ta AI, e unico cu Aruba mester ta un bon sistema di traduccion Papiamento pa Ingles. Si nos lo por tin e herment aki na nos disponibilidad nos por habri e porta pa usa tur e hermentnan masivo di Open-Source AI LLMs tocante cual mi a skirbi varios bes. Esaki lo por revoluciona practica di ley, medicina, consulting y mas na nos isla. Dus esaki sigur mester ta un punto di enfoke.

 

Na di dos lugar stimula entrepeneurship den agricultura y energia solar sofistica cu posibilidad di modelonan di negoshi innovativo, uso di tecnologianan nobo manera AI, smart materials, glass special, hydroponics avansa y hopi mas.

Tur e innovacionnan aki por yuda baha costo di bida na Aruba y na mesun tempo crea entrada y trabou pa ambos individual y gobierno. Pues si OStad Incubator, ser bon maneha, e por nifica algo sumamente bunita pa Aruba.

Financiamento pa Energia Solar:

Den e conferencia di Prensa over e reciente black-outs, Minister di Energia, Croes a expresa cu el a puntra ELMAR N.V. tocante e posibilidad pa bira e “E Banco pa Aruba su Pueblo cu kier instala Solar Panels”. Manera mi a skirbi tanto bes, mi ta hopi contento cu finalmente ta wak movecion den rumbo positivo.

Usando e data mas recien, instala solar panels na un cas residencial tin un Yearly Return-on-Investment di 35% caba, pues den menos cu 3 aña e inversion lo paga su mes back. E lo yuda haci Aruba mas independiente di importacion di fuel oil y yuda cu Aruba su balansnan monetario/reserva.

E unico cu ami lo kier contribui na e concepto aki si en berdad e haya follow-through manera debe ser ta pa usa e sistema di financiamento di “DUO/IBG” di Hulanda con educacion ta ser financia.

Un lening cu interes di 0% of hopi abou, y cu por ser paga back den 35 aña. Mas importante si ta cu si un ex-studiante bin den problema financiero e no tin cu haci pago na DUO pa e aña ey. Pues e no ta un prestamo cu condicionnan masha halto cu por caba malo pa den e caso aki e doño di cas. Den caso di energia solar por haci un prestamo cu interes di 0% y cu por ser paga back den 20 aña por ehempel. ELMAR N.V. por haya ganashi dor di cumpra e energia excesivo produci na un tarifa atractivo pa e compania di electricidad den cuestion.

Asina empodera full pueblo di Aruba pa bira mini “generators” di electricidad. Tambe como delaster punto tambe bin cu subsidio pa pueblo instala airconan zuinig y bin cu conceptonan cu lo spaar energia.

En fin nos ta wak movecion cu por resulta hopi bunita y positivo pa Aruba. Pero den esaki nos mester wak si e maneho di e conceptonan ehemplar aki ta bon y cu no ta solamente promesa y press conferences, pero tambe follow-throughs y accion berdadero.