Hues den corte di prome instancia a condena Stanley Geerman, asesino di P. Graciete, kende el a mata dia 30 di juni 2013, na 14 aña di prizon, contra sugerencia di Fiscal, kende na su turno a pidi 13 aña.
E caso aki tabata uno cu sigur a yama atencion di comunidad, mirando e manera cruel cu e asesinato a tuma luga, den oranan di mainta tempran dilanti di Club 21. Durante tratamento di e caso, tata di e victima, tabata t’ey presente, pero e no a keda satisfecho cu e sentencia. E tabata kier mas aña.
Capta riba video
Durante e dia aki, e echo cruel aki a wordo capta riba camara di siguridad di e establecimento y por a mira claramente con Geerman a tira Graciete, un tiro fiho den cabes, y el a cana bay manera nada no a pasa, lagando tur hende eynan den un shock y den panico.
Un dia scur
Ainda por corda riba e dia aki, cu ademas di e asesinato den sanger friu aki, dos asesinato mas a tuma luga, pero te ainda no tin e conocemento si e casonan aki lo a bin dilanti caba. Esaki sigur tabata un mancha mahos riba siguridad di nos isla caminda cu arma di candela a hunga un rol.
Na Colombia
Despues di e delito, Geerman a huy bay den exterior. Autoridad tin sospecho cu e ta na Colombia y e hecho cu tin evidencia y basta testigo, ta haci cu Geerman por wordo persigui den exterior, mirando cu e crimen tabata uno intencional y premedita.
Fiscal bisa cu ta straño pa splica e tata di e victima cu apesar cu 30 Juni 2013 intencionalmente y premedita, Geerman a tira mata Graciete cu esaki ta e forma pa por persigui Geerman den exterior.
Castigo
Hues ta haya cu e video ta mustra claramente cu ta Geerman a mata Graciete y despues a core bay y huy for di Aruba. Fiscal ta considera esaki un asesinato cruel. El a bisa cu pa cu e castigo, teniendo cuenta cu Geerman ya na 2009 a wordo condena na 15 luna pa violencia publico, a exigi 13 aña di prizon. A keda proba, segun hues, cu legalmente Geerman a tira Graciete mata y a indica cu e echo cu Geerman a huy, pues no para responsabel pa su acto, hues a tuma esaki hopi na curason y a haya cu Fiscal a exigi mucho poco y a dicidi di subi e castigo na 14 aña. Mirando e echo aki, Ministerio Publico lo bay haci su intento pa logra cu na Colombia por extradita Geerman pa Aruba.
