Stanley Dabian: Por duna boet di mil pa 250 mil na esunnan cu no cumpli cu exigencianan

Pa Departamento di Cultura Aruba (DCA) ta importante pa trece dilanti cu e bandera ta un simbolo nacional hopi importante pa e pais, p’esey ta importante pa trece e parti dilanti e parti di conscientisacion. Segun Sr. Stanley Dabian Relacionista Publico y Comunicacion di Departamento di Cultura Aruba (DCA), for di october 2014 y januari 2015 a anuncia e oficialisacion di e color di bandera. DCA ta autorisa pa duna boet na esunnan cu no ta cumpli cu e exigencianan.

P’esey ta haci yamada na henter comunidad pa tin e color oficial di e bandera cu ta uni tur hende y pa duna respet na algo cu ta nacional pero tambe na tur ocasion oficial di celebracion di dia nacional. E motibo importante ta cu den e ley a keda poni cu DCA ta encarga cu esaki y p’esey ta pidi tur esunnan cu kier haci importacion y bendemento di bandera pa pasa Departamento di Cultura pa haci peticion y despues lo wordo aproba, Sr. Dabian a indica.

Pa por bin na remarca pa e peticion, esun cu ta bay haci pedido mester hiba na e departamento tur su datonan, mester trece e proveedor di unda e banderanan ta wordo busca. Tambe mester duna informacion riba e cantidad di bandera incluso e tamaño di bandera cu lo wordo pidi cerca e proveedor, el a indica. E importado of bendedo mester presenta na e departamento cu un muestra despues di a haya esaki di e proveedor. Asina ey DCA por mira e muestra y e importado por bin na remarca pa haya e permiso for di e departamento. “Nos director den nomber di minister di cultura ta podera pa firma e permiso aki,” segun Sr. Dabian.

Duna boet

Si e negoshi ta un instancia, e ora mester wordo poni kende ta e persona huridico cu ta responsabel. Mester pone nomber di e persona y su posicion huridico den su forma di e negoshi, tambe e miembronan di directiva di e negoshi. Segun e ordenansa AB 1991 nr. 191, na prome instante e controladonan Sr. Flemming y Sr. Dabian lo duna advertencia pero esaki ta depende di cada caso. Tambe por duna boet. Si ta un cargamento grandi esaki ta entre 10 pa 250 mil florin. Tambe tin pa casonan cu nan ta bende bandera y e cantidad ta chikito, tin un suma di boet di mil pa 3 mil florin. P’esey Sr. Dabian ta pone enfasis cu cada caso ta diferente.

Validez di permiso

E permiso cu Departamento di Cultura ta duna lo tin un validez di 1 aña. Pero si e persona comete infraccion den e periodo ey, tin e oportunidad cu e permiso lo por wordo kita for di dje. “E importante ta cu e apelacion ta bay desde awor cu e ta oficialisa pa henter pueblo di Aruba pa tin e color di bandera corecto. Tambe pa tur esunnan cu ta importa y bende bandera pa bin busca bo peticion di e permiso y pa haya e permiso pa asina sigui provee e pueblo local e bandera corecto,” el a bisa.