“Cultura ta expresion di ser humano; ta un expresion di manera con e ta biba, cuminda cu e ta come, tradicionnan cu e ta celebra di e pais, manera di bisti, entre otro. Creencia ta forma parti di dje, hunto cu balornan y cu tur Arubiano ta mira esey, e tradicion di e famia cu tin diferente custumber; den poco palabra ta e fundeshi di un comunidad”, tabata e palabranan di Stanley Dabian, Relacionista Publico y Comunicacion di Departamento di Cultura.

Durante un entrevista cu Bon Dia Aruba a haci cu Dabian, el a duna di conoce cu tin basta aña trahando cu cultura. El a comenta cu for di hoben e tabata involucra den diferente aspectonan cultural manera teatro, toca algun instrumento tipico, el a crea su mesun grupo di baile yama Alimah Aruba y hunto cu Fundacion Farpa a haci diferente actividad cultural.

Tocante esey, a recorda cu el a haci diferente festival di teatro y asina tambe el a actua. “Mi amor pa cultura, mi amor pa hende y pa mi pais, ta algo grandi cu ta biba den mi y desde cu mi ta den e departamento aki, mi ta haci’e cu amor”, Dabian a destaca.

Di loke ta trata su anecdota den area di cultura, Dabian a manifesta cu na diferente proyecto, festivalnan, teatro, esey ta algo unda el a haya hopi experiencia. Pero actualmente, ‘loke ta hopi bunita ta cu mi ta un empleado publico, pero den particular, mi ta haci hopi proyecto, mi ta yuda diferente fundacionnan y manera con mi ta desplega mi trabou, esey ta trece mi alegria den tur momento’.

Dabian a menciona tocante problemanan den cultura na Aruba, cu hopi biaha loke ta e limitacion den e aspecto aki ta trata cu gobierno y e presupuesto cu tin disponibel pa desaroyo di actividadnan cultural. Ademas el a sigura cu ta hopi importante pa e pueblo di Aruba siña aprecia locual ta dje, siña busca pa conoce su cultura.

Den ultimo tempo cultura tin su expresion mas amplio den e proyectonan cu nan ta haci pa scolnan avansa. “Hopi mas ta e hobennan cu ta bin na departamento di Cultura pa busca informacion pa traha tema cultural y esey ta nifica cu e cultura ta bibo” Dabian a duna di conoce.

Si Stanley Dabian den un futuro lo bira Minister di Cultura, el a señala cu den prome forma ta pa realisa e leynan riba nivel cultural, diferente cosnan cu no ta existi door di tempo. Tin cu traha leynan pa comproba e sostenibilidad di e cultura, pa motibo cu cultura por bira sostenibel ora ta crea oportunidad y facilidadnan pa por profesa esaki mas y duna bek pa sigui promove cultura, siña e barionan kico ta nan celebracionnan, dia nacional o fiesta tradicional, con e Arubiano tabata biba antes y con ta biba awor.

Di loke ta trata e turistanan cu ta haya interes pa sa mas tocante cultura di Aruba, Dabian a bisa cu ta existi un programa di certificacion di historia di turismo, cultura, comunicacion y sitionan emblematico di naturalesa. “Awendia e turista no ta bin casino pa gasta placa, e ta bin pa conoce museonan, sitionan arkeologico y naturalesa”, manera el a sigura.

Ta importante, segun Dabian, cu mester comparti tur e hermentnan cu cultura ta ofrece. Banda di esey loke gobierno ta facilita y yuda lamentablemente no tin continuacion, pa motibo cu tin hopi proyecto den otro signatura.

Pa finalisa, Dabian a manifesta cu mester comparti e manera con e Arubiano ta recrea nan mes, na nivel cultural; conoce e monumentonan, conoce e tradicion pa duna for di e Arubianonan, bishitante y esunnan di otro pais cu ta biba na Aruba e producto special cu ta ‘Nos Cultura’.