Stanley Dabian, PR comunicacion di Departamento di Cultura, durante e conferencia di prensa di Fundacion Lanta Papiamento a trece dilanti e topico cu algun hende di comunidad tin pensamento un tiki robes di loke e idioma Papiamento ta ofrece, ora un mucha bay studia na un scol halto y cu nan no lo uza mas e lenga materno aki.
Riba esey, Dabian a bisa cu un persona no por nenga e idioma cu e persona a nace cune. E persona ta pensa semper prome den su idioma materno, y p’esey ta hopi importante pa e persona balora e idioma, pa promove, respeta y hiba esey na tur caminda.
Aruba ta un isla hopi chikito y cu ta depende di turismo; ta importante cu e mesun hende bay bende e Papiamento, laga e bishitantenan di afo conoce e rikesa cu e idioma Papiamento tin.
“Nos mester ta gradici cu esunnan cu ta pionero y cu a keda persevera tocante Papiamento”, Dabian a sigura. Ta existi hende cu ta bisa cu Papiamento ta stroba enseñansa, pero awendia cu Papiamento ta oficialisa, hende mester balora cu esaki ta un simbolo di identidad Arubiano, Dabian a finalisa.
