Ayera comandante di Brandweer, Edward de Cuba a purba di trece un mensahe di trankilidad den nos comunidad. Mientras cu e mal contento cerca e personal di bombero debi cu nan ekiponan y tambe infrastructura di nan edificionan ta den mal estado, a haci cu sindicato di Brandweer (SINBA) a bin ayera cu un accion morocoy cu ta continua keto bay.

De Cuba di un banda a bisa cu nan ekipo ta fragil. Pero aunke nan no tin suficiente truck, nan ta keda cumpli cu e tarea cu nan tin di asisti pueblo den candela, accidente auto y yuda den cualkier emergencia. “Nos lo t’ey,” el a bisa.

Ademas tin procedura poni pa garantisa e servicio. Nan tin backup di ekipo di aeropuerto dependiendo di e incidente pa asina tin no solamente suficiente personal sino ekipo. Sinembargo e ta reconoce cu actualmente brandweer su ekipo ta fragil. E comision encarga cu e punto aki ta evaluando alternativa kico ta bay haci, mirando e retonan den finanzas publico y e retonan cu tin den brandweer pa cu material nobo. Un idea ta renoba e ekipo cu nan tin y trece nan bek den e certificacion cu nan ta.

Dialogo

Di otro banda De Cuba a trece su mensahe pa nan coleganan den e cuerpo aki. El a bisa cu nan ta trahando duro pa resolve e problemanan den cuerpo. Tambe el a formula un invitacion pa sinta hunto y dialoga, y si algun di nan tin un pregunta, malcontento, preocupacion, nan por bin cerca nan pa papia. “Pasobra nan sa cu nos porta ta habri,” el a bisa.

E ta consciente cu cos no ta bon, pero cos no ta malo tampoco. Ora algo ta pasa tanto e truck como e personal ta yega. Pero e ta consciente e por ta miho. Tambe el a bisa cu nan tin plannan hopi grandi pa cu brandweer, no solo local sino mustra un bon cara den full reino Hulandes.

Igualmente el a nenga cu niun momento nan a bay bisa den Parlamento ni dilanti minister cu e ‘cos ta bon.’ Segun De Cuba, nan a yega di splica minister Andin Bikker riba e preocupacion cu tin, y e mandatario en cuestion tambe sa di e problemanan interno cu tin den e cuerpo uniforma aki. Sinembargo den e situacion financiero cu nos ta pasando aden ta dificil pa tin fondo disponibel pa aloca pa atende nan necesidadnan.

Tambe e ta haya cu e problema den brandweer no ta di awor sino cu pa hopi aña ta pasando, pero aworaki ‘cu e sapato ta preta y no tin placa pa cumpra e sapato, e ta bira un problema mas grandi,’ asina figurativamente el a bisa. De Cuba no a bin cu cifra di nan necesidad financiero.

De Cuba a bisa cu nan a invita e trahadonan di e cuerpo aki pa forma parti di cierto comisionnan, ya cu nan kier nan contribucion shen porciento. “Nos ta trahando pa e cuerpo y pa tur hunto bay dilanti pareu,” el a bisa.

Tocante e situacion cu e mesun sindicato a yega di denuncia te hasta pidi un investigacion interno riba e maneho. De Cuba ta haya cu si nan ta cuestionando su maneho of di otro officier, nan mester por papia. El a declara cu a sinta cu staf di brandweer caminda nan ta dispuesto pa dialoga. Nan por tin diferente opinion y bista riba kico ta bon y kico ta malo. Pero esey no kiermen cu nan no por para banda di otro y traha pa e cuerpo di bombero.

De Cuba a laga sa cu nan no sa si sindicato tin algun motibo cu no kier reuni cu nan. Nan ta dispuesto si pa sinta cu sindicato te hasta den weekend mes si mester manera nan a yega di sinta den pasado.

E hecho cu e sindicato ta wordo forma pa e trahadonan cu ta core warda madruga y atardi, e ta compronde cu no ta tur momento nan por ta disponibel pa sinta tampoco. Pero si nan ta haya un chens, ya sea un weekend of despues di ora di oficina, nan ta dispuesto pa sinta hunto pa atende cualkier situacion.