E nomber Stacy Hassell no ta desconoci den e mundo di deporte y fitness. Hassell ta propietario di A+ Sports Performance unda e ta train fitness, personal training y tambe e ta train mayoria di e bringadornan den e mundo di deporte di pelea. Den un entrevista cu Bon Dia Aruba, e ta conta di su trayectoria den e mundo di fitness y pelea, con el a yega na unda e ta awo y kico su vision pa futuro ta.

Hassell a cuminsa cu e deporte mes ora cu e tabatin 10 aña y for di eynan el a djis sigui den dje. El a conta cu e ta corda cu na un edad basta jong e tabata train na San Nicolas y su trainer e tempo ey a dicidi di habri un di dos scol na Madiki, y a pidi Hassell pa cuminsa yuda e muchanan cu tabata biniendo nobo despues di dje. Asina el a keda encarga cu e gym na San Nicolas y di eynan el a sigui bay pa dilanti.

Su prome competencia tabata tempo e tabatin 11 aña y su ultimo pelea tabata net prome cu e pandemia. Na momento cu el a retira, el a retira cu seis titulo bao su nomber; Campeon Nacional, Campeon di Caribe, Campeon Antias (e tempo ey), Campeon Intercontinental y Campeon Panamericano.

El a splica cu despues cu el a stop di bringa nan a pidie pa haci un pelea mas y el a dicidi di haci esaki despues cu e tabatin ya caba ocho pa nuebe aña sin bringa.

“Mi a bin back, mi a haya e competencia ey. Mi a haya e smaak back pa mi sigui competi, pero net e ora ey pandemia a bin y e ora a bira otro dos, tres aña sin competi. E ora mi a dicidi di concentra riba e hobennan,” Hassell a indica.

El a remarca cu door di tin asina hopi tempo sin competi y si e kier bin back, e tin cu tuma hopi mas tempo pa su mes y si e haci esey, e tin cu pone e muchanan un banda un rato pa e por concentra riba su mes. “A lo largo ta e muchanan ta e futuro, dus mi ta prefera concentra mas riba nan y ami si mi hacie ta djis pa smaak y diversion.”

Na su gym, Hassell ta cuminsa tuma muchanan for di cinco aña di edad y tin diferente grupo; tin e grupo di 5 te cu 10 aña, 10 te cu 16 aña y 16 aña bay ariba. Den cada grupo tin un grupo apart cu ta avansa, cu ta capta e cosnan mas lihe y esey ta loke nan ta yama e ‘fight team’. E muchanan ta competi den boxing, kickboxing, muay thai y MMA local of internacional.

Pa hopi tempo, y te ainda, hopi hende ta mira e deporte di bringamento como un deporte pa hende homber so. Pa Hassell esey no ta e caso. El a enfatisa cu e deporte cu e train no conoce genero ni edad. “No ta importa si bo ta mucha homber, si bo ta mucha muhe, jong, grandi, chikito, bieu, e sport ta pa tur hende. Hopi biaha hende ta bisa nan ta hinca e mucha den karate of taekwondo, e ta keda un deporte di pelea. Esaki ta un tiki mas bruto, pero e ta keda un deporte di pelea,” el a resalta.

Pa loke ta trata con el a yega na su propio gym, Hassell ta conta cu semper el a traha normal na diferente caminda y den su tempo liber e tabata duna training, pero hopi hende tabata pidie pa train durante dia. Pero e tempo ey e tabata duna training den un gymzaal di scol y e por duna training ora cu no tin scol, cual ta parti atardi of anochi, pero tabatin hende cu tabata kier train mainta of merdia.

El a cuminsa cana su caminda y a cuminsa cana rond pa busca un local. Na prome instante el a bishita e mesun local na unda e ta situa aworaki, pero no tabata huur e. Na e momento ey el a bay full den personal training y e tabata duna training na un gym y na e gymzaal di scol.

Despues e mesun local di prome tabata disponibel pa huur y el a transferi su gym y a haci su pasion su trabao full-time.

Pa loke ta su vision pa futuro, Hassell ta desea pa tin un luga mas grandi, preferiblemente si ta su mes ta miho y cu e por logra hiba e atletanan no solamente pa bringa internacionalmente, pero pa yega na un di e plataformanan mas grandi cu tin den e mundo di bringamento.

Por ultimo Hassell su mensahe: “Mi mensahe pa hubentud di awendia, vooral pa esnan cu ta riba caya ta haci malo, bringa den gang of cosnan asina, ta pa nan cuminsa train un deporte. E no mester ta necesariamente den e mundo di bringamento, pero ya cu nan ta gusta bringa tanto etc. mi ta conseha nan pasa cualkier scol, tin varios, cu ta haci e deporte. E ta algo cu ta yuda bo no solamente den e deporte, pero e ta algo cu ta yuda bo hopi den bida pasobra e ta rekeri disciplina, e ta rekeri consistencia, e ta rekeri di hopi cos pa bo por yega leu den e deporte y tur esaki ta cosnan cu bo mester den bida tambe.”

“Mi lo bisa cu e ta un deporte cu lo yuda hubentud pa stop di haci e cosnan malo cu nan ta haciendo riba caya. E ta un deporte cu a yuda ami mes, pasobra tempo mi a lanta mi tambe a lanta den mal caminda y haci hopi cos malo y for di ora mi a drenta den e deporte cu mi a dicidi cu mi kier yega un caminda cu e deporte aki, mi mester a pone tur e cosnan ey un banda pa mi por a yega na tur e titulonan cu mi a yega na dje,” el a termina.