Diadomingo ultimo riba dia nacional di Himno y Bandera, sindicato STA conhuntamente cu nan delegadonan di ASTEC a reuni cu minister di labor, Glembert Croes (MEP), prome cu e mandatario a biaha Hulanda. Nan a splica e mandatario kico ta pasando na waf di Barcadera. Si nan no sali di e impasse aki, minister di labor lo apela pa sostene un reunion cu e partidonan.
Ayera presidente di STA, Diego de Cuba a declara na Bon Dia Aruba cu tin un acercamento cu gerencia di Astec durante e ultimo reunion cu nan a sostene cu intermediacion di mediador di gobierno. Awe mainta nan lo reuni un biaha mas, y STA ta masha positivo cu finalmente ambos parti lo por yega na otro riba aspecto financiero.
For di october ultimo nan ta negoshando y tratando di yega na un contracto colectivo pero te ainda nan no por haya otro. Nan a keda pega riba dos punto cu e ta kere cu por yega facil na dje cu ta e bashi premie y aumento general. Mientras cu asunto di overtime lo keda pendiente pa wordo trata.
P’esey e no ta descarta cu awe eventualmente huma blanco lo sali for di e reunion cu nan ta sostene cu mediador di gobierno. Segun e sindicalista, e peticion di STA no ta nada descabeya. Actualmente e trahadonan ta den un accion di no traha overtime. Esaki a pone cu a bin un bruhamento total, segun sr. de Cuba.
“Pero gerencia mester compronde cu e ultimo arma cu empleado di un compania tin, ta ora cu nan ta bay over den un accion di protesta”, el a bisa.
Sinembargo STA ta mira cu sumo preocupacion cu gerencia di Astec ta haciendo uzo di personal no certifica pa opera riba waf. “Nos ta compronde cu gerencia ta poniendo yen di hende straño…” E ta haya cu esaki ta bay contra tur etica y regla. Esaki ta algo cu ta trece hopi risico ya cu si algo pasa, e compania mes ta bay sufri e daño y seguro no lo bay cubri esaki.
