Sindicato STA a haci un yamada pa tur trahadonan di departamento nautico (Nautische Dienst) di APA atende un reunion urgente awe for di 1’or merdia te cu 2’or atardi na vergaderzaal di APA mes.
Presidente di STA, Diego de Cuba a declara na Bon Dia Aruba cu nan tin e representacion sindical di e trahadonan aki, kiermen di full APA. Pero nan a bin compronde for di un grupo di empleado cu tin cierto malcontento. Sr. de Cuba ta haya cu APA N.V. no ta un organisacion grandi mas manera antes. E no ta yega sikiera 100 trahado mas. P’esey e ta kere cu nan mester cuida e grupo di trahadonan cu ainda a keda y tambe nan tin cu cuida e CAO cu nan tin aworaki. “No bay nabega den un barco sin rumbo”, e ta bisa.
Considerando cu STA ta drentando den negociacion pa un contracto colectivo nobo (CAO), directiva di sindicato ta haya cu ta prudente pa bay clarifica e diferencia di opinion y mal contento cu tin bou e trahadonan cu ta cay den departamento nautico. STA kier sa con nan ta para ora cu e trahadonan aki ora cu nan ta drenta den e base crucial di e negociacion aki.
El a referi riba e referendum cu a tuma luga caminda sindicato TOPA a pidi un referendum pa APA, pero nan no a logra haya e mayoria. E resultado aki a duna STA e status pa mantene e representacion di e trahadonan. “Nos a compronde cu tin un grupito minimo cu kier uza full e departamento nautico pa nan wordo beneficia di dje”, el a bisa.
Segun e veterano sindicalista nan ta empleadonan cu ta gana ariba di 10 mil florin pa luna. Y STA ta compronde cu ta un persona ta esun cu ta trata di crea e ambiente di malcontento aki. P’esey nan kier tin e reunion cu e grupo di trahadonan di departamento nautico di APA pa wak kico nan pensamento ta.
STA ta kere cu si ta e lucha di un persona cu kier uza full un departamento pa e wordo beneficia personalmente, nan ta rechasa esaki. STA kier evita cu e trahadonan ta wordo mal uza. Pero si e persona ta bringando un lucha comun y pa full e grupo, sindicato STA ta para completamente tras di e persona aki, el a declara na Bon Dia Aruba.
