Aunke STA no ta aparece inicialmente den e bloke sindical cu a condena e echo cu gobierno a kita bashi premie y gelijkbedrag di tur pensionado, nan ta para “schouder schouder”banda di e otro sindicatonan entre nan TOPA y SPA. “Nos a laga nan sa cu nos ta sostene nan completamente”, asina presidente di STA, Diego de Cuba a declara na Bon Dia Aruba.
E invitacion a drenta laat y STA mester a atende otro compromiso cu a haci cu nan no por a participa den e reunion. Sinembargo e lider sindical ta bisa cu el a informa nan otro coleganan sindical cu e asunto aki ta algo cu a bin dia cu e sindicatonan a firma e protocol den seno di dialogo social. E ta e mesun protocol caminda edad di pensioen a subi, y e parti aki di kita bashi premie y gelijkbedrag di e pensionadonan tabata hinca den dje caba.
Sindicalista De Cuba a splica su colega di lucha sindical, Rene Bernabela di TOPA pa check den detaye e articulonan di e protocol menciona pa wak si e punto specifico aki a wordo firma caba e tempo aya. E ta bisa cu e tempo aya cinco sindicato a firma, entre nan SPA, SIWA, SADA y SEPPA. “Kiermen e pida aki cu ta biniendo awor, e no ta un sorpresa pa mi.”
Sindicalista De Cuba ta considera cu aunke e pida di kita e bashi premie y gelijkbedrag a wordo hinca den e protocol menciona, ta logico cu gobierno no por haci’e. E ta kere cu mester bin cu un cambio radical riba e punto aki; ya cu si gobierno ta hacie nan ta “discriminando”. E ta haya cu e bashi premie, gelijkbedrag y e otro premienan ta debenan cu gobierno tin cu e trahadonan publico. “Pues no ta un regalo. Kiermen pa motibo cu bo no por ahusta bo salario pa motibo di indexering, bo ta haya esey como recompensa." Tambe e 13 ATV dag cu a wordo duna ta parti di e compensacion aki cu a wordo duna na e trahadonan di e sector publico. Esaki debi cu gobierno no por duna nan den nan salario, nan a bin cu e solucion aki.
“Awendia e hendenan ta masha cauteloso mes pa banda di nan placa y nan a bira mas defensivo. Bo por spera problema si gobierno ta mantene nan posicion”, segun e presidente di STA. Considerando cu bashi premie, gelijkbedrag y e otro premiernan ta debenan cu gobierno tin cu e trahadonan di e sector publico, sindicalista De Cuba ta kere cu akinan tin un asunto cu gobierno mester atende debidamente cu ne, ya cu e por bira un problema grandi.
