Directiva di sindicato STA a informa cu despues di a reuni cu su miembronan emplea na e compania Triple A NV (aeropuerto), dia 15 di augustus ultimo a haya e mandato unanime di su miembronan pa presenta e concepto nobo pa cu e contracto colectivo (CAO) nobo 2020-2023, cual lo mester bay wordo negocia den e lunanan venidero.
Dia 19 di augustus 2019 a entrega e concepto nobo conforme stipulacionnan den nan contracto colectivo vigente. Segun STA, e participacion den e concepto aki tabata uno hopi habri y democratico, caminda a tene cuenta cu tur peticion cu a bin di parti di nan miembronan cu a asisti na e reunion.
Sindicato STA ta e sindicato cu a negocia e prome CAO pa e compania Tiple A N.V na aña 1996, den cual a pone e base, fundeshi, pa un CAO hopi bon balansa y hopi lucrativo pa e empleadonan di e compania aki.
Na aña 2001 –segun directiva di STA– un otro sindicato a drenta y a desbarata e CAO aki. Pero despues cu e sindicato STA, cu sosten di e empleadonan, a ‘core’ cu nan, STA a drenta bek pa drecha e daño haci y a tuma e sindicato basta tempo pa drecha tur e daño ocasiona pa e otro sindicato. Asina STA a informa den su comunicado di prensa.
Desde aña 2004 te cu awe, ta sindicato STA a negocia e contracto colectivo pa e empleadonan di ‘AAA NV’ cu semper a conoce adelanto durante e ultimo 15 añanan, nan a laga sa.
E directiva nobo di STA a indica cu nan a sa di hiba e empleadonan den tur sector di e compania dilanti; y lo continua haciendo esaki den e contracto colectivo nobo, tambe cual concepto ta uno hopi eleva y bon balansa. Compara cu e esun actual, lo ta un adelanto atrobe pa tur departamento di e compania en cuestion.
Directiva di STA kier a gradici y felicita e empleadonan pa cu e concepto nobo aki di e CAO y ta spera cu dentro di poco lo cuminsa cu e negociacionnan pa un contracto colectivo nobo.
