Despues di a reuni diabierna atardi na sede di SIMAR cu e delegadonan di e companianan di construccion cu ta resorta bao di WAB, y tambe e empleadonan representa pa STA, a bin na un consenso cu e contraoferta di WAB, entrega un dia prome pa locual ta e CAO, ta inaceptabel pa e trahadonan
E sindicato a laga sa cu e trahadonan ta rabia cu WAB su oferta, y te hasta nan ta cla pa bay accion. Nan ta urgi directiva di WAB pa bin cu CAO e biaha aki mas husto. Pero di otro banda, nan no kier tende nada mas di protocol cu a wordo firma como tres aña pasa. Sino cu nan kier sinta negocia un CAO completamente nobo.
STA tin e concepto cla caba y den e dianan cu ta sigui lo manda esaki pa WAB. Apesar cu a pidi Mediador di Gobierno pa traha riba un “tussenvoorstel” of un pakete alternativo, e sindicato no ta kita afo e deseo pa un contracto colectivo completamente nobo.
E oferta presenta pa WAB no a cay den bon tera cerca e trahadonan riba e punto di aumento di salario. E companianan ta confronta algun reto y preocupacion den mundo di construccion. Tin keho contra competencia desigual den e sector di construccion, y te hasta den proyectonan grandi caminda companianan di afo cu trahadonan di afo ta bin realisa e trabounan aki. Pero tambe un falta di control di parti di e autoridadnan competente pa evita esaki, apesar cu nan a yega di reuni cu gobierno pa atende cu e problema aki.
