Presidente di STA, Diego de Cuba a declara na Bon Dia Aruba cu nan sindicato no tin miedo di ningun reto, tampoco di niun hende di sindicato Union di Electricista Arubano (UEA). “Nos ta cla pa cualkier debate. Si nan kier un debate, nos no tin problema cu esey”.

Esaki tabata e reaccion cu e lider di STA a trece dilanti cerca e matutino aki despues cu vice presidente di UEA, Gilbert Dirksz a desafia e sindicalista de Cuba pa trece prueba si e protocol cu nan kier a firma cu gerencia di Elmar lo ta desastroso pa e trahadonan. Tambe el a dun’e 24 ora pa haci esey.  Presidente di STA den su declaracion a abstene su mes di papia of referi riba e protocol aki. Sinembargo el a laga sa bon cla cu “no ta nos di STA a busca e hendenan aki, ta e hendenan aki a busca e sindicato STA pa defende nan”.

Mas afiliacion
Sr. de Cuba a duna un up date di e trahadonan cu a afilia na STA. Te cu diabierna ultimo 86 persona a afilia na nan sindicato. El a agrega cu den total nan a ricibi 61 carta di retiro cu nan ta bay manda pa e directiva di UEA y gerencia di Elmar.

Tambe el a indica cu apart di e 61 trahadonan cu a retira nan afiliacion na UEA y cu a “duna nos e copia di nan retiro”, STA a wordo informa door di e mesun trahadonan cu tin 25 mas cu tambe a entrega nan retiro. Pues nan ta papiando di alrededor di 86 trahadonan di Elmar cu a retira for di UEA pa bay afilia na STA como nan sindicato nobo.

“Esaki ta nifica cu e mayoria absoluto a retira for di e sindicato UEA. Nan no tin confiansa mas den e sindicato”, segun sr. de Cuba.

Presidente di STA ta wardando algun contesta despues cu nan a solicita un referendum via oficina di Mediador di Gobierno. Igualmente prome cu nan ta drenta den e proceso di bay un referendum, STA a solicita mediador di Gobierno pa brinda su intermediacion y asina haci posibel pa convence gerencia di Elmar pa reconoce STA como e sindicato cu ta representa e mayoria di nan trahadonan y asina evita e caminda di e referendum.

“Si esaki no ta posibel mi ta kere cu e trahadonan ta cla pa pone presion pa haya reconocimento”, el a bisa.

Mediador di Gobierno
Bon Dia Aruba a acerca Mediador di Gobierno, Anselmo Pontilius kende a trece otro angulo di e noticia aki. A puntra e mediador di e contracto colectivo (CAO) di e trahadonan y si e cambio di sindicato lo por afecta nan. Sr. Pontilius a laga sa cu unabes cu tin un CAO firma entre un dunado di trabou y un sindicato, e contenido di dje no ta cambia si otro sindicato ta bin aden. Sinembargo e por cambia solamente si e dos partidonan atrobe, esta dunado di trabou y sindicato, ta yega na un acuerdo pa bay cambia un of otro articulo. E espirito di e ley aki tambe ta splica cu na momento cu bo firma un CAO entre dos partido, e partidonan ta mara na e contenido di e CAO pa e periodo ey.

Tambe el a laga sa cu e unico cambio cu bo por exigi como partido ta, si bo ta constata un of mas articulo den e CAO cu ta contra nos leynan laboral. “Esey bo tin cu cambi’e pasobra ley ta bisa bo cu bo no por tin un texto den un contracto colectivo cu ta contra nos leynan”, el a declara na e matutino aki. E tipo di caso aki no ta uno frecuente pero e no ta descarta cu e lo por sosode. Pero absolutamente no ta asina cu pa e echo cu e trahadonan cambia di un organisacion sindical y bay otro organisacion cu e CAO ey ta cambia.

Encuanto si tin un proceso di negociacion canando pa firma un CAO nobo y ta resulta cu mayoria di e trahadonan ta cambia pa otro organisacion sindical, e momento ey logico e sindicato cu ta bay paden por bin cu cierto proposicion, segun Mediador di Gobierno.