Den dos dia consecutivo sindicato STA a sostene un accion cu trahadonan di Caribbean Palm Village y AMC Unicon a tene siman pasa. Presidente di STA, Diego de Cuba ta premira cu lo bin mas accion den otro companianan, mirando e pakete di impuesto di e crisisheffing y actitud poco ‘arogante’ di algun dunado di trabou.
E sindicalista a declara na Bon Dia Aruba cu sigur e pakete di impuesto lo tin su impacto den e negociacion di contracto colectivo (CAO) y tambe ariba e comunidad muy specialmente e BAVP pa paga e PPP proyectonan. Tambe e ta bay pisa riba e cartera di e consumido. “Si. E medidanan ta bay forma un obstaculo pa cu negociacionnan di contractonan colectivo y nos ta consciente di esey”, segun de Cuba. Tambe e ta kere cu tur e companianan ta consciente di esey tambe.
Sinembargo e ta haya cu e ta un decision inevitabel. “Bo no por keda sin introduci e medida aki. Pasobra mirando e gravedad di e situacion y embergadura di e debe cu nos pais ta confrontando”, e di.
Sr. de Cuba a afirma cu sindicato STA a adverti e gobierno anterior riba e situacion financiero di crisis di pais Aruba. E ta haya cu ta masha bunita pa bo sinta goberna y gasta placa cu bo no tin. Na final di cuenta ta pueblo ta bay paga. “Mi welo a bisa mi: Mi yiu no puntra ken ta e morto, puntra ken ta bay paga entiero.” Den e caso aki e ta haya cu a nos como comunidad y consumidornan tin cu bay paga e peso. Tambe e prijs di e proyectonan cu tabatin.
Sin duda e ta haya cu tabata den su luga y masha bunita pa embeyece nos pais y drecha infrastructura locual ta necesario, pero por a bin cu nan den facetanan y no bay asina abrupto. Pero gobierno anterior a bin cu un serie di proyecto grandi y miyonario casi pareu manera hospital, Green Corridor, Watty Vos Boulevard. Tabatin algun proyecto cu tabatin un prioridad manera ampliacion y renobacion di hospital, pero e caminda pa ehempel di Green Corridor por a tuma luga den faceta, y evita un peso grandi riba e pais y su ciudadanonan. Nan ta casi 2 biyon di debe cu pueblo tin cu bay paga ya cu gobierno su presupuesto no por carg’e. ‘Pa e motibo ey e medidanan mester a bin’, segun e sindicalista.
E no ta descarta cu e pakete di medida lo tin su efectonan riba negociacion di CAO nan. El a referi tambe na e incidente cu a sosode cu gerencia di Caribbean Palm Village ora cu e trahadonan a bay den accion. E ta spera cu e situacion aki no ripiti unda nan a haya un ‘gerencia hopi arogante’. E sindicalista a bisa cu nan tin filmacionnan cu ta mustra con e gerencia di Caribbean Palm Village ta ‘bin intimida e empleadonan’.
STA ta haya cu e actitud aki ta un violacion fragante contra di e derecho constitucional, kiermen nan derechonan di expresa y manifesta, y tambe di bay den un accion. E sindicalista de Cuba ta kere cu e gobierno tin cu actua pa atende cu situacion asina. STA a keda di haci entrega di e grabacion y haci un keho formal tambe te hasta na ministerio publico (OM) si ta necesario, y tambe na gobierno. STA ta haya inaceptabel e actitud aki.
