Mediador interino di gobierno, Marushka Tromp a declara na Bon Dia Aruba cu e reunion pidi pa sindicato STA pa atende diferente asunto di Arubus a bay den bon ambiente. Nan a pone atencion riba diferente punto di e protocol cu a keda firma dia 10 di februari ultimo entre gerencia di Arubus y STA.

STA a trece un punto extra cu no tabata den e protocol riba prima di pensioen di e trahadonan. Ta asina cu nan a pidi gerencia pa duna nan mas claridad con e calculacion di e prima cu e trahadonan ta paga na APFA ta tuma luga. Sra. Tromp a splica cu den e reunion mes cu nan a sostene, gerencia di Arubus a bisa di biaha cu e mesun dia di nan reunion nan lo atende cu e punto aki.

Segun gerencia di Arubus, no ta trata aki di un problema di calculacion, sino cu un texto bieu a keda riba nan salario slip. Ayera tur empleado mester por a haya un contesta por escrito splicando for di unda e fout aki a bini.

Puntonan di atencion tabatin un exigencia di parti di e trahadonan di Arubus representa pa sindicato STA, ya cu segun nan gerencia no a cumpli cabalmente cu tur e puntonan acorda den e ultimo protocol. Esaki a demanda cu ora e reunion aki a keda habri, mediador di gobierno mester a pasa punto pa punto. Tabatin algun punto cu gerencia di Arubus a cumpli cu ne. Un di nan tabata e rijvergunning cu no tabata na ordo; y cu finalmente a wordo soluciona pa tur chauffeur di Arubus.

Tambe un punto cu nan ta delibera riba dje tabata e structura di salario cu nan no por a yega prome na un palabracion. Pero riba mesa a bin un proposicion cu e partidonan a bay di acuerdo riba loke tin riba mesa. Prome cu dia 10 di augustus gerencia lo ratifica e decision cu a wordo tuma.

Nan a bin cu e solucion temporal aki mirando cu entrante otro aña nan lo cuminsa cu e negociacion di un contracto colectivo (CAO) nobo. Den cuadro ey nan lo mira si full e structural di salario mester di un cambio integral.

Otro aspecto cu STA a pidi mas informacion ta riba e plan pa drecha e busnan cu sindicato a yega di denuncia publicamente ya cu un gran parti di nan flota ta of tabata den mal estado. Den e reunion aki cu intermediacion di e mediador di gobierno y mediador interino, sindicato STA a reclama cu e punto aki riba mal estado di e busnan no a wordo atendi debidamente cu gerencia di Arubus.

Finalmente nan a yega na un conciliacion caminda ambos parti a bisa cu nan tin espacio pa mehora e palabracion cu nan tin. Igualmente oficina di mediador di gobierno a conseha nan pa stipula un periodo specifico den nan rooster riba ki dia nan tin e reunionnan y kende mester atende e reunion pa trece claridad y evita dificultad cu por afecta nan operacion.

STA tambe a pidi cu nan kier reuni cu minister encarga cu Arubus, ya cu for di februari nan ta purbando y no a wordo concretisa, a pesar cu mediador di gobierno ta purbando pa e dos partido aki sinta hunto. Den principio e sindicato kier comparti nan vision pa futuro, nan preocupacionnan y nan solucionnan tambe di un manera constructivo cu e mandatario.

E partidonan a haya e reunion aki constructivo; pero si recordando cu tin un protocol cu nan mester mantene na dje. Otro siman por ta lo tin un siguimento pa wak si e partidonan a haya loke a wordo palabra den e reunion di dialuna ultimo.