Pa medio di un proces-verbaal a formalisa e reconocimento entre gerencia di Aruparking y sindicato STA, asina e sindicato awor ta representa e trahadonan di e compania estatal aki.
E acto aki a tuma luga dilanti di Mediador di Gobierno, Anselmo Pontilius kende a referi na e referendum cu a yega di tuma luga un par di siman atras. El a splica cu debi cu den e proceso aki a participa cu su voto un trahado cu tabata den su 60 dia di prueba, y cu normalmente no mester a participa segun e reglanan vigente di referendum, e no tabata valido mas.
Debi cu tabatin un discusion riba e mayoria di trahadonan cu a vota pa busca representacion sindical pa sali for di impasse aki tabatin dos alternativa: Celebra un referendum nobo of cu gerencia di Aruparking ta reconoce e sindicato, sin mester di pasa den e proceso aki atrobe.
Sr. Pontilius a bisa cu gerencia di Aruparking a sinta cu representante di STA, caminda e sindicato a mustra riba papel cu un gran mayoria di e trahado ta desea nan como nan sindicato. Nan a bay di acuerdo pa firma un proces-verbaal cu a tuma luga diahuebs merdia. Ta asina cu for di awor pa dilanti ambos parti, dunado di trabou y sindicato, mester mira con nan ta bay atende cu otro pa negosha e condicionnan di trabou
