Sindicato STA kier felicita tur trahado na Aruba cu semper ta mucha pa hiba e pais dilanti. “Nos kier felicita nan ariba nan dia,” presidente di STA , Diego de Cuba a declara na Bon Dia Aruba.
E mensahe principal cu e lider sindical di STA kier trece dilanti pa e clase trahado ta pa unifica nan mes den cualkier sindicato. “Pasobra ora bo tin un sindicato bo tin un defensa.” STA por ripara cu ultimamente ni 10% di e clase trahado ta resorta bou un sindicato. Kiermen un 90% di e personanan cu ta traha na Aruba no ta wordo representa pa medio di un sindicato.
Presidente di STA ta lamenta e situacion aki cu mayoria di nos trahadonan no ta representa bou un sindicato. Locual e ta haya cu ta refleha e ‘cultura di miedo’ cu nos clase trahado tin. Pero di otro banda ta existi cerca nos clase trahado un falta di conocemento di nan derechonan riba tereno laboral.
Pa e motibonan aki, STA ta urgi tur e empleadonan sin importa pa cual companianan of instancianan nan ta traha pa unifica y organisa nan mes bou un sindicato pa asina nan por haya defensa na momento cu nan ta confronta un problema. Pero e necesidad pa haya mas informacion tocante bo derechonan laboral.
