Mas di 100 productor local tradicional di cannabis lo beneficia di training den ‘best practices’ den cultivo di e mata e siman aki na St Vincent & Grenadines.
Esaki ta tuma lugar mientras e Medicinal Cannabis Authority (MCA) ta continua sigurando cu e grupo di inversionista ta keda competitivo y ta miho posiciona pa beneficia di e produccion legal di cannabis medicinal na e pais. E training ta bin inmediatamente despues di actividad similar pa profesional medico local y nan personal.
Lo enfoca riba best practices den cultivo di cannabis medicinal, mantene registro y posibilidad di sigui pista di produccion. E training ta na encargo di Tom Ritchie, Vice President di Accounts & Education na Ample Organics, cu ta un proveedor lider na Canada di solucion den produccion di cannabis, incluyendo plataforma di software ‘seed-to-sale’. MCA a drenta den un partnership cu e compania aki pa loke ta diseño di su propio ‘tracking software’ nacional.
Un presentacion encuanto e procedimentonan pa yega na un cuenta di banco pa productor tradicional cu licencia y nan empleadonan tambe lo ta parti di e agend di e curso. Den e sesionnan ta planifica tambe discurso di ministro encarga cu agricultura Saboto Caesar y CEO Jerrol Thompson.
Cannabis na St Kitts & Nevis.
Mientras tanto, desaroyo similar ta tumando lugar na otro islanan, manera St Kitts & Nevis unda ta pone enfasis tambe riba cultivo di cannabis pa productor local. Presidente di Cannabis Core Committee, Dr Wycliffe Baird, a bisa den entrevista cu e no ta kere cu ta corecto “pa laga stranhero drenta y domina e industria, pa despues nan bay emplea e localnan.”
Aunke cierto input di exterior ta crucial pa establece e industria, Dr Baird ta kere firmemente cu localnan mester gosa di mayoria di e beneficionan.
