Negoshi y casnan a enfrenta un otro ola di blackout diabierna, mientras compania di coriente, GEBE a continua experimentando ‘algun problema’ pa un di dos dia consecutivo.
E compania a bisa cu ta experimentando ‘algun problema’ cu su ‘sistema di generacion’ na e planta electrico, y a indica cu ‘nos ingeniero- y tecniconan ta trahando diligentemente pa resolve e problema cu e generator’.
“E problemanan aki a causa varios area pa perde coriente. Nos lo continua cu ‘load-shedding’. Nos ta pidi dispensa pa e inconveniencia aki”, segun oficial di relacion di media di GEBE, Paula Gordon a bisa.
Varios area a keda sin coriente pa periodonan di un ora y mey, algun pa mas largo, mientras algun area manera Dutch Quarter tabata sin coriente mas cu un biaha diabierna, causando malcontento entre e residente y negoshinan den e areanan aki.
E blackout tabata dificil pa hopi persona, kendenan a haya nan mes forsa pa soporta e calor extremo na cas y negoshi sin fan ni unidad di airco pa fria.
CEO di GEBE, Kenrick Chittick, a bisa cu e motor tabata trahando, mientras GEBE a bisa den un post riba nan pagina di Facebook cu un di nan generator a wordo restart y e compania tabata añadiendo load gradualmente. “Unabes tur cos bay bon, lo stop cu ‘load-shedding’ dentro di e proximo ora.”
E compania tambe a bisa cu e area tras di Cake House na Cay Hill tabata sin coriente pa algun tempo, cual no tabata asocia cu e ‘load-shedding’.
Diabierna tabata e di tres dia cu e isla a experimenta blackout. E serie di blackout a cuminsa diaranson. E dia ey, GEBE a bisa cu esaki tabata pa motibo di un fayo den un cable cu ta pasa coriente pa Dutch Quarter, Oyster Pond y areanan cerca, y cu pa motibo di biento fuerte y yobida, a dura mas largo cu tabata spera pa localisa e fayo riba e cable.
Tocante e blackout diahuebs, e compania a bisa cu tabata hayando problema cu un di su motornan mas grandi na e planta di energia, y cu tabata efectuando ‘load-shedding’.
