(CuracaoChronicle) – Secretario di Estado pa Asuntonan Interno y Relacionnan di Reino, Raymond Knops, diaranson a informa prome minister di St. Maarten, Silveria Jacobs, cu el a deferi e firma di e di cinco tranche di sosten di likides di NAf. 39 miyon, pa motibo di e ‘situacion hopi preocupante’ relaciona cu maneho corporativo di Aeropuerto Internacional Princess Juliana.
E placa no lo keda libera te ora cu gobierno di St. Maarten a tuma accion decisivo pa restaura situacion na e aeropuerto.
Den un carta na Jacobs, Knops a declara cu no solamente el a expresa preocupacion na gobierno di St. Maarten tocante e desaroyonan na e aeropuerto, sino tambe na e representante special di Hulanda den e proceso di reconstruccion, Frans Weekers, na Banco Mundial y Roya Schiphol Group (RSG).
“Tur e advertencianan aki no a resulta den accionnan corectivo di St. Maarten como accionista di aeropuerto. Ta p’esey mi mester conclui cu duna advertencia y recordatorionan continuo no ta suficiente mas pa salvaguardia recuperacion di aeropuerto, y pa extension, e recuperacion economico di henter e pais”, el a declara.
Segun Knops, e ‘maneho no confiabel’ di e director y dos miembro di hunta di supervision di compania holding di aeropuerto, PJIAH, tin ‘consecuencianan cada bes mas adverso pa ehecucion di e proyecto di reconstruccion y e realisacion di bon gobernacion’.
Knops a destaca cu stabilidad y salvaguardia e capacidad necesario tabata crucial den un proyecto grandi y esencial manera esaki, specialmente den e fase actual di contratacion. “Specialmente e momento den cual e situacionnan aki ta sucede, mirando e contratacion actual, ta pues incomprendibel.”
Knops a bisa cu e representante special y su persona varios biaha a tene combersacionnan cu gobierno di St. Maarten den ultimo lunanan, urgiendo gobierno pa tuma su responsabilidad como accionista y sigura cu reconstruccion di e terminal di aeropuerto por continua sin obstaculo. “Maske bo ta keda enfatisa bo compromiso cu e proyecto di reconstruccion y e mehoracion necesario den gobierno corporativo, e desaroyonan den practica ta totalmente contradictorio, y mi a mira masha tiki accion fuerte di bo gobierno den e dossier aki”, el a declara.
“Bo a ignora e señalnan cu nos a discuti cu bo como rumornan, y bo ta keda ribae punto cu gobierno como accionista mester tene distancia. Naturalmente esaki ta generalmente corecto, pero den e caso di negligencia grave y hasta maneho no confiabel di e miembronan di e hunta, manera ta pasando na PJIAH awo, ta keda na e accionista pa actua decisivamente.”
Knops a comenta cu pa por adkiri financiamento pa reconstruccion di aeropuerto, gobierno di St. Maarten lo haci su maximo pa sigura bon gobernacion na aeropuerto. El a nota cu e promesa aki, cu tambe ta parti di landspakket, no a keda cumpli.
“Como resultado, e confiansa den e colaboracion cu bo gobierno a keda daña. Door di continuamente tin un maneho demasiado laat y no suficiente fuerte, no solamente bo ta pone reconstruccion di aeropuerto na peliger, sino como resultado directo, e recuperacion economico di henter e pais”, el a declara.
“Bao di e circunstancia aki no por exigi di Hulanda pa nos sigui inverti decenas di miyones di euro den e recuperacion economico aki. Ta p’esey atrobe mi ta bay presenta e di cinco tranche di sosten di likides na Conseho di Minister di Reino dia 21 di mei. Mi solicitud lo ta pa deferi pago di NAf. 39 miyon den sosten di likides na St. Maarten te ora cu bo gobierno a actua suficientemente fuerte pa structuralmente restaura e problemanan na e aeropuerto y salvaguardia e proceso exitoso di e proyecto di reconstruccion di e terminal di aeropuerto”, Knops a declara.
E secretario di estado a finalisa su carta declarando cu e tin speransa cu gobierno di St. Maarten por presenta un ‘solucion satisfactorio’ pa e situacion durante su bishita na St. Maarten na comienso di proximo siman. “Esaki den interes di St. Maarten y su pueblo.”
