Prome cu tratamento di e mocion pa finalisa e proceso di decolonisacion, parlamento di St. Maarten a move pa busca consehonan legal di un bufete basa na Washington DC, cu lo duna asistencia pa cumpli cu su metanan. E idea ta pa tambe inclui Aruba y Corsou den e proceso.

E dos meta describi den un acuerdo di contratacion pa Choharis Law Group dia 1 di october ultimo, cual ta den man di corant di St. Maarten, The Daily Herald, ta: completa e proceso di decolonisacion mediante un Conferencia di Mesa Rondo (RTC) na mei y juni otro aña, culminando den un acuerdo cu Hulanda na juli, y pa asisti den busca reparacionnan di Hulanda.

Choharis Law Group a manda e acuerdo di participacion pa Corsou, Aruba y St. Maarten na parlamentario di St. Maarten, Grisha Heyliger-Marten dia 1 di october, ken inmediatamente a manda esaki na presidente di parlamento, Rolando Brison y prome vice-presidente, William Marlin. A manda e propuesta na Corsou y Aruba algun dia despues.

Den e acuerdo di contratacion, Peter Choharis a declara cu e tabata complaci cu ‘e parlamentonan, partidonan politico, fundacionnan, individuonan y/of otro miembronan di sociedad civil di Corsou, Aruba y St. Maarten’ a retene e bufete legal pa traha den nomber di e islanan.

Cada un di e tres paisnan lo paga un suma fiho di $7mil pa luna, cual e bufete a bisa ta apenas un fraccion di e prijs regular cu e ta cobra y ta representa un descuento di 91 porciento.

E acuerdo tambe ta stipula un suma di contingencia, un porcentahe cu lo ser paga na e bufete for di e reparacionnan cu Hulanda lo paga, si otorga esaki, e compania lo ricibi un suma di contingencia di 0.085 porciento. E resto, 99.915 lo bay na e paisnan.

Den e acuerdo ta declara cu e bufete legal lo provee servicionan legal, incluyendo asesoria, conseho strategico, negociacionnan y servicio similar solicita pa e paisnan den protege y promove nan meta y interesnan y pa logra nan obhetivonan.

E prome accion lo ta pa busca esfuersonan den Nacionnan Uni y cuerponan internacional. E bufete legal lo asisti e paisnan pa tuma contacto cu e Comite Special di ONU pa Decolonisacion, e Grupo di Trabao di Expertonan riba Hende di Descendencia Africano, y e Rapporteur Special riba formanan contemporario di racismo, discriminacion racial, xenophobia y intolerancia relaciona.

E cuerponan di ONU aki lo ser pidi pa examina y reporta riba e situacion den e tres paisnan di Hulanda Caribense. “Door di valida e realidadnan politico cu e islanan kier adresa, un reporte di e Comite Special riba Decolonisacion lo ta hopi efectivo pa persuadi gobierno Hulandes pa participa na e RTC na 2021. Hasta e prospecto di un investigacion y rapport asina probablemente lo persuadi Hulanda pa participa.”

Den e acuerdo a destaca cu e reporte di juli 2015 di Grupo di Trabao di Expertonan riba Hende di Descendencia Africano, basa riba su bishita na Hulanda y Corsou un aña prome, merece un reporte di siguimento, specialmente ya cu ta parce cu no a considera previamente e preocupacionnan actual di e islanan.

E base pa bay cerca e Rapporteur Special riba formanan contemporario di racismo, discriminacion racial, xenophobia y intolerancia relaciona, un experto independiente di derechonan humano, nombra pa ONU, lo ta un reporte di augustus 2019 cu ta ‘adresa e obligacionnan pa cu derechonan humano di estadonan miembro (di ONU) den relacion cu reparacionnan pa discriminacion racial cu raiz de sclavitud y colonialismo’.

E bufete lo asisti e paisnan den nan esfuerso pa atrae sosten regional y internacional pa e negociacionnan di RTC 2021, incluyendo organisacionnan manera CARICOM y e Comite di Reparacion di CARICOM, pero tambe miembronan di gobierno Hulandes, parlamentarionan Hulandes, y otronan.

E bufete tambe lo asisti Corsou, Aruba y St. Maarten de revisa e construccion cu a ‘preveni nan di sigura nan derechonan y soberania’ y tambe e ‘operacion practico di varios institucionnan legal dentro di Reino cu a resulta den e rechaso andando di derechonan humano’ na e paisnan.

Tocante e RTC, e bufete lo duna asistencia cu desaroyo di un strategia pa negociacionnan RTC, den forma di yuda structura e formato, desaroya agendanan, prepara y revisa propuestanan legal di reforma politico, y si ta necesario, sosten directo pa e teamnan di negociacion na e RTC mes. E resultado final mester ta e firmamento di un acuerdo cu gobierno di Hulanda na juli 2021.

E bufete lo duna asistencia na e paisnan pa busca dañonan di Hulanda pa e daño- y privacionnan cu e Hulandesnan a infringi riba e islanan y nan pueblo durante colonialismo Hulandes y sclavitud, violacionnan di obligacionnan legal internacional durante periodo post-Segundo Guera Mundial, y e legado di daño cu lo sigui herida e islanan y nan pueblonan den futuro.

Na Aruba, parlamentario di oposicion, Richard Arends a confirma pa Bon Dia Aruba cu parlamento di Aruba a ricibi e carta aki diabierna ultimo, ‘cu un oferta di parlamento di St. Maarten’.

Nota di redaccion: Ta imaginable cu e noticia por causa bastante confusion na Aruba, ya cu nos isla y nos poblacion ta den un situacion bastante distinto compara cu e otro islanan tambe. Ta importante pa gobierno duna claridad si nos ta envolvi of no den e asunto aki, y en caso afirmativo, duna un splicacion di un que otro. Ademas nos ta den un situacion financiero unda no mester di splica cu pa gasto excesivo y innecesario no tin lugar actualmente.