E caso di un supuesto proyecto di cultivo di cannabis, den cual e biyonario Alkiviades (Alki) David, di nacionalidad Mericano, ta envolvi, a haya un buelta inespera. Recientemente a detene David y su compañero di negoshi, Chase Ergen riba acusacion di importacion ilegal di cannabis y mata y simiya di cannabis, mientras nan tabata argumenta cu e material tabata pa cuminsa un cultivo di cannabis na e isla. David a haya su libertad, pero Ergen ta deteni ainda na e isla, sperando e caso hudicial contra nan.
David mientras tanto a logra haya cita cu prome ministro di e isla, dr. Timothy Harris. Despues David a declara na prensa cu e negociacion cu Harris a kibra, despues cu e ministro “a pidi mi (David) pa haci algo cu mi no ta desea di haci.”
David y Chase Ergen a anuncia recientemente cu nan a forma un consorcio pa desaroya cultivo di cannabis na diferente isla den parti oriental di Caribe, manera St Kitts-Nevis, Dominica y Antigua. Nan plan tabata inclui compra di tereno y crea partnership cu agricultornan local den un entidad cooperativo, segun un modelo crea na Suiza.
“Ora nos a yega,” David ta conta, “mi a kere cu nos ta haya un bon ricibimento. Despues ta resulta cu nan a keda di aresta nos partner local, Dr Denzil Douglas, ex-prome ministro, y nos a haya un mal trato. Mi partner Chase a ser acusa di tin droga, loke despues a resulta di ta su remedinan, y e ta cera ainda pa a discuti cu un agente policial. Nos no a spera esey. Henter e asunto a tuma un rumbo fuera di proporcion,” segun David.
