A pesar cu e lista di warda pa renobacion/mantencion di un scol por ta largo, tin caminda pa cana pa haci algun cos sin mester di cada biaha depende di gobierno. Esaki cabesante Nadine Kirindongo di scol basico St. Franciscus College den bario di Madiki ta comparti cu Bon Dia Aruba, kende a caba di habri e aña escolar aki cu un bachi nobo.
“Como scol bo tin un caminda pa cana, bo ta pone bo directiva di scol na altura, bo tin bo list cu deseonan cu bo ta manda pa SKOA (directiva di scolnan catolico, red.) caminda bo sa kico bo necesidadnan ta. Bo por tin un lista di deseo largo pero no ta tur ta wordo honra na bo,” e cabesante ta splica nos. Sra. Kirindongo ta bisa cu pa ta riba lista di warda pa mantencion por tarda hopi. Pero como scol y como un team nan mes na St. Franciscus a dicidi por ehempel cu nan no ta warda pa cierto trabaonan cu mester wordo haci na e scol.
Nan mes ta tuma accion
E cabesante ta splica nos cu por ehempel den nan caso, nan ta considera St. Franciscus college como un famia. Nan ta wordo inspira pa tuma accion y no constantemente warda pa gobierno haci algo, segun e cabesante ta laga sa. “Nos ta pensa pues con nos por haci pa nos scol tin mas ambiente y ta mas ameno pa nos por traha. Mi mes a bin e scol aki tambe como alumno, y bo kier haci algo pa bo scol y bario den un manera positivo. Como un famia nos a dicidi nos ta haci cosnan pa nos mes.” Nan ta acerca mayornan, comerciantenan y organisa actividad pa haya fondo pa logra na drecha of mantene diferente tipo di cosnan na e scol.
Bachi nobo
St. Franciscus College e aña aki a habri cu un bachi nobo. Henter e scol a haya un verf y tambe un logo nobo cu a wordo pinta y diseña door di Claudia Ponson. “Nos ta gradici e hunto cu su famia inmensamente. E bunita di e logo aki ta cu e ta duna honor na nos patrono San Francisco. Nos como un scol catolico ta hopi contento cu esey.”
E scol tin dos klas cu tin mester di bentanan nobo di cual fundacion SKOA a cuminsa yuda caba cu esaki. Na aña 2010 e scol a haya un verf completo pero e tabata di mal calidad pa motibo cu a verf e den tempo di awasero segun e cabesante. E aña aki nan a haya yudansa cu verf. Tempo cu Marisol Tromp tabata encarga como minister di enseñansa, e scol a haya un hekwerk nobo cual a yuda hopi cu ladronicia te dia di awe. “Como bario Madiki ta importante pa nos tur bini hunto y cuida y mantene nos scol. Placa pa mantencion bo no ta haya tur ora, e importante ta pa ora cu bo mira algo chikito, di biaha bo fix e. No por sinta warda riba SKOA te ora haya placa. Tin biaha bo tin cu cera wowo y hacie,” e cabesante ta bisa.
Sra. Kirindongo ta laga sa cu e tin un team dinamico cu ta para su tras anto hunto nan ta traha pa hiba e scol dilanti. “Nos ta traha pa duna st. Franciscus un nomber positivo. Si bo puntra unda St. Franciscus College ta, hopi hende no sa. Pues aworaki tambe nos ta mas activo online, mayornan ta mira e trabao, muchanan tambe ta bin scol cu smaak y nan ta contento. Pa e aña escolar aki e scol ta riba e lista pa haya airco y asfalt cu ta na caminda. E scol aki ta wordo uza pa traimerdia pues e ta draai dos biaha den un dia, cual segun e cabesante ta trece hopi gasto.
Adopta un scol
Varios famia di Merca y vice presidente di compania Lenovo a bishita St. Franciscus y a haci un donacion na e scol di varios material. Tin compania local tambe cu a yuda e scol cu sistema di alarma. Y asina tin mas luga cu e scol ta acerca pa cualkier yudansa cu nan por haya. Docente di 6de klas y cabesante suplente na St. Franciscus Eleonor Warner Maria ta conta nos: “Nos a lobby, busca y papia cu hendenan tocante e situacion di nos scol. Nos a logra haya un compania priva pa yuda nos.” Sra. Warner ta bisa cu pa algun cos cu nan mester a drecha na e scol nan djis no por a keda warda mas. “Nos tin basta tempo ta warda y nos kier a haci algo pa e muchanan. Pasobra bo ta sinti bon pa ora bo ta bek na scol y e ta mustra bon, tur mucha gusta esey.”
E ta comenta cu lo ta hopi ‘great’ si mas comerciante/companianan priva cuminsa yuda e scolnan y duna un man unda cu nan por. Por ehempel si cada un por adopta un scol cu nan ta yuda tur aña cu algo chikito manera verf of ora mester drecha algo. Docentenan mes por ehempel ta yuda verf y drecha cosnan cu nan por na e scol. Bo por bisa cu esey no ta nan trabao y no ta cay bao nan responsabilidad, pero como comunidad sra. Warner ta pensa esey ta e manera pa apropiadamente lanta e muchanan.
“Nos tin hopi mucha cu nan situacion na cas ta un tiki fastioso. Como scol nos ta purba percura pa ora e muchanan yega akinan nan sinti cu nan a yega un luga safe y sa cu nan docentenan t’ey pa nan na un scol drechi. P’esey tambe nos ta enfoca pa drecha e scol pasobra e no ta scol di gobierno e ta pa e muchanan.”
