Prinses Beatrix a realisa un bishita di un dia na St. Eustatius diabierna, dia 13 di december. E anterior Reina di Hulanda y mama di Rey Willem-Alexander a yega a bordo di un avion di Winair alrededor di 8.30am.

Na aeropuerto F.D. Roosevelt, Comisionado di Gobierno, Marcolino ‘Mike’ Franco; Comisionado Interino di Gobierno, Mervyn Stegers; Secretario Interino di Ilsa, Malvern Dijkshoorn-Lopes; Assistent Ehecutivo di Comisionado di Gobierno, Marianne Schroen, otro dignatarionan y un comite di bonbini a ricibi e Prinses.

Little Miss Statia/Junior Carnival Queen Melifanny de Palm a presenta na Prinses Beatrix un bouquet di flor. Un multitud grandi di muchanan di scol, adultonan hoben y ciudadanonan di edad avansa tabata presente pa aplaudi e Prinses Hulandes mientras el a sali di e sala di salida di aeropuerto. E multitud a grita saludo, canta y zwaai bandera mientras Killy Band a toca un variedad di musica bieu y nobo.

Prinses Beatrix a bishita diferente organisacion y a papia cu representantenan enfocando riba proteccion di naturalesa di Statia y proyectonan di conservacion, manera Statia Earth Farm and Garden Foundation, Made in Statia Nursery and Greenhouse, St. Eustatius National Parks STENAPA, Caribbean Netherlands Science Institute CNSI, y otronan.

Despues di un tour breve di e cunucu, director di STENAPA Erik Boman y otro staf y miembronan di hunta di e diferente organisacionnan di naturalesa a ricibi e Prinses. Na oficina di STENAPA, e Prinses a puntra tocante e yuwana ‘lesser Antillean’, cu ta den peliger. Tabata un suerte cu e bishitante real y su acompañantenan a logra mira un di e reptilnan aki den un mata paden di e boatyard di STENAPA.

Na Daughters of the King (DOTK), Prinses Beatrix a mira arte traha pa muchanan cu ta atende e programa tra’i merdia, y el a presencia un grupo di mucha recitando e promesa y tema di DOTK.

Residente mas bieu di Statia, Sophia ‘Mary’ Busby di 100 aña di edad, director di centro di salud y recreo Chapel Piece, Hilda Berkel, y otro hendenan di edad avansa a bay edificio di DOTK y papia brevemente cu e prinses.

Na Mega D. Youth Foundation (MYF), un banda di drum y un presentacion di entertainernan di MYF a ricibi e prinses. Director di MYF, Dion ‘Mega D’ Humphreys, miembronan di staf y e muchanan cu ta atende e programa tra’i merdia a canta y interactua cu e prinses.

Hubentud di Statia a tene un manifestacion cultural na e Dutch Reformed Church, unda Beatrix, como reina e tempo ey, a pone e prome piedra pa e restauracion di e iglesia dia 6 di november 1980. Na caminda pa e iglesia, awa cu tabata yobe a traves di e dia a cuminsa cay mas fuerte, y e prinses a bisti un poncho. Su Mahestad hunto cu Comisionado Franco a drenta den e iglesia cu Reina Grandi di Carnaval Kentonea Fortin, y Reina Junior di Carnaval Queen De Palm, mientras e dos hoben muhe a tira petalo di flor dilanti di e dignatarionan. E Prinses a inspecciona e iglesia recien restaura como tambe e prome piedra cu su firma, cual ta desplega prominentemente den e edificio historico aki.

Prinses Beatrix a yega aeropuerto, unda el a ricibi un ultimo presentacion di Killy Band. Clementina Wilmans di 90 aña di edad a saluda e prinses, pa despues ambos dama baila na musica di ‘Te La’ y ‘Christmas Greetins’. E prinses despues a sinta pa scucha Killy Band canta ‘We Too Glad’, componi den honor di e prinses pa Walton Schmidt.

Despues di bisa ayo na miembronan di e comite di bonbini, e prinses y su acompañantenan a aborda e avion di Winair y sali for di Statia. A pesar di e yobida fuerte, un multitud grandi tabata presente na aeropuerto pa despedi di Beatrix y desea e un biahe sigur na cas.