E prome ceremonia publico di matrimonio di mesun sexo na St. Eustatius a tuma luga na Vincent A. Lopes Legislative Hall diabierna atardi. Cheryle Dorset y Sharon Berkel di Registro Civil a efectua e ceremonia, den cual director di Monumento di St. Eustatius y historiado Walter Hellebrand a uni den matrimonio cu escritor y fotografo Christopher ‘Chris’ Russell.
Mama di Hellebrand, Elly, a lesa un escritura di Bijbel bisando: “Bo por tin tur cos den mundo, pero si bo no tin amor, bo no tin nada.” Rumannan di Hellebrand, Esther y Ralph tambe a biaha pa St. Eustatius pa e boda.
Tambe presente pa e ceremonia tabata presidente di Instituto Hulandes pa Derechonan Humano, Adriana van Dooijeweert, y su consehero di politica, Vlada Burmistrova, como tambe comisionado di gobierno interino di St. Eustatius, Mervyn Stegers y cantidad di famia y amigonan di e pareha.
Van Dooijeweert a bisa cu e tabata hopi contento y orguyoso di ta presente den e prome boda di mesun sexo publico y inclusivo na Statia. “Mi tabata hopi orguyoso di duna un discurso tocante e derecho fundamental di dos persona pa casa, homber cu homber y tambe muhe cu muhe”, Van Dooijeweert a bisa.
Articulo 12 di Convencion Europeo di Derechonan Humano ta duna tur persona e derecho aki. “Esaki ta un evento publico cu cantidad di hende, y mi tabata hopi contento di tende cu ora Walter a anuncia cu e ta bay casa, hopi di su coleganan a bisa cu nan tabata contento p’e. Mi ta kere esey ta e mensahe pa awe”, Van Dooijeweert a bisa.
Mientras e pareha tabata sali di Legislative Hall, e presentenan a blow burbuha pa celebra e union, na luga di aros, ya cu aros curu tin un impacto dañino riba bida salvahe.
Despues di e ceremonia tabatin un recepcion na restaurant Oceanview Terrace.
Esaki no tabata e prome matrimonio di mesun sexo na Statia. Varios otro pareha a uni anteriormente, pero a preferi pa nan boda keda priva.
