St. Eustatius: Gobierno suplicando pa hende cumpli cu cuarentena

Residentenan di St. Eustatius a entrega kehonan tocante hende cu tabata den cuarentena pa motibo di coronavirus y toch a mira nan den publico interactuando cu otronan. A mira e hende aki coriendo rond cu amigonan, ricibiendo amigonan na cas, y bishitando cas di amigo y famia.

Entidad publico St. Eustatius a manda un aviso na hende den cuarentena, specialmente esunnan cu no ta tene nan mes na e reglanan. A declara cu hende violando e cuarentena potencialmente ta poniendo bienestar y hasta bida di otronan den peliger, incluyendo nan sernan keri.

Studiantenan y otro residentenan cu a bolbe na e isla den ultimo siman, y kende a ser poni den cuarentena, mester cumpli cu e reglanan pa preveni COVID-19 drenta St. Eustatius.

“Esaki ta nifica cu bo por keda pa 14 dia den cuarentena na bo cas, den bo camber of apartamento. Bo cumplimento cu e medida aki ta tur locual Statia ta depende riba dje, specialmente trahadonan di salud y persona cu problema respiratiorio. Cumpliendo cu esaki ta un sacrificio chikito pa un recompensa grandi. Nos ta conta cu cada un di boso”, segun Ingrid Whitfield den nomber di e entidad publico.

Comisionado di gobierno, Marnix van Rij anteriormente a declara como parti di ordenansa nacional dia 18 di maart ultimo, cu si hende no cumpli cu e orden di oficialnan apunta, nan ta den violacion di reglanan di e ordenansa aki, locual lo resulta den un ofensa castigabel cu un sentencia custodial di un maximo di tres luna y un multa di segundo categoria.

Gobierno a declara cu cuarentena ta un medida preventivo cu ta tuma na momento cu un persona ta potencial portador di COVID-19. Den e caso aki, hende mester keda cas pa 14 dia y evita contacto cu otro hende. Despues di 14 dia sin sintoma di malesa, por descarta cu nan ta portador di e virus.

Diabierna ultimo, a mira pasaheronan cu a yega den e vuelo charter di Oficina di Seguro di Salud ZVG for di Colombia via Bonaire interactuando cu miembronan di publico. E pasaheronan aki mester a bay den cuarentena asina nan baha di avion, pero a mira nan compartiendo cu hende na F. D. Roosevelt Airport.

Segun Ordenansa di Emergencia, cualkier persona biahando di un pais unda tin caso confirma di e virus mester bay den cuarentena na cas. Un oficial di departamento di Salud di St. Eustatius tabata presente pa papia cu e pasaheronan.

Un testigo a bisa The Daily Herald cu hende riba e isla ta ‘serio’ tocante COVID-19. “Si tin varios caso di COVID-19, por ‘wipe-out’ henter e isla”, el a bisa.