(AP) – Sri Lanka su lider den oposicion lo enfenta den e eleccion presidencial proximo siman a bisa cu si e ricibi e victoria e lo renegocia cu International Monetary Fund e pakete di reforma di 2022 pa garantisa cu e personanan di mas recurso paga mas impuesto y esnan den pobresa mira nan condicionnan mehora.
E reformanan aki a ser introduci despues cu Sri Lanka a cay den e pio crisis economico den su historia.
Sajith Premadasa, e lider den oposicion di parlamento a conta The Associated Press den un entrevista cu su partido ya caba a cuminsa dialogo cu IMF pa busca manera di alivia e peso di impuesto riba e pueblo.
“Nos lo cuminsa cana e tercer caminda, e caminda cu ta meymey, unda rikesa ta ser crea, e pais ta crece y rikesa ta distribui di manera igual,” Premadasa a declara.
El a bisac u tambe mester tin “cambionan fundamental” na e acuerdo actual entre IMF y gobierno di Sri Lanka sinembargo esaki mester haci di un “manera mas humano” pa garantisa cu e presion riba e pueblo ta menos.
“Y si tin presion cu mester keda imponi, esnan sumamente rico y rico mester di manera desproporciona tuma un parti mas grandi di e peso na luga di e hende homber y hende muhe di menos recurso na Sri Lanka.”
Sri Lanka ta den medio di reforma y un programa pa restructura debe bao un acuerdo cu IMF unda e impuesto a ser aumenta pa mehora e estado su entrada. Despues cu e isla nacion no a cumpli cu su deuda externo den 2022, prestamo a ser reduci y pa ley a para impresion di biyete nobo.
E partidonan den oposicion ta bisa sinembargo cu hopi di e personanan rico y cu coneccion cu e autoridad no ta paga nan impuesto y e peso ta cay mas den e clase medio y abao via impuesto di ingreso y impuesto di balor ora di haci compras of paga pa servicionan.
E eleccion presidencial cu lo tuma luga dia 21 di september ta mira como un referendum tocante e reformanan inicia pa President Ranil Wickremesinghe. Nan a mehora cifranan economico clave, pero nan efecto te ainda mester yega varios persona ordinario.
Premadasa a critica Wickremenghe su politicanan economico bisando cu e ta purbando di haya solucion via contraccion. Premadasa a bisa cu su politica ta di “crece for di e problema” via un economia basa riba conocemento y exportacion.
Premadasa, di 57 aña, ta e yiu di difunto ex president Ranasinghe Premadasa, ken a ser asesina pa un separatista etnico Tamil den 1993.
Tambe el a participa den e eleccion presidencial di 2019 y a perde contra Gotabaya Rajapaksa, ken a ser obliga di huy despues di 2 na den medio di protestanan contra e pais su caida economico.
Debe insostenibel, un crisis severo den balans di pago, efectonan di COVID-19 su pandemia y e gobierno su gasto di reserva den exterior pa mehora e pais su moneda rupee, a causa na un escasez severo di moneda den exterior y esencialnan manera fuel, medicamento, gas pa cushina y cuminda den 2022.
