Sra. Yvette Geerman di Dep. di Higiena: “Ley ta bisa cu si no tin carchi di salud na ordo, bo no por bende cuminda”

Personal di departamento di Higiena y Inspeccion di Cuminda ta realisando e debido control pa garantisa e higiena y bon condicion di e cuminda cu ta wordo ofrece durante parada di carnaval.

Sinembargo e publico carnavalesco mes mester ta atento y critico ora cu nan ta bay consumi cualkier cuminda ya sea riba restaurant, establecimento comercial y/of tent di cuminda durante carnaval, esaki ta e advertencia cu Hefe di Departamento aki sra. Yvette Geerman a haci.

El a laga sa cu apesar cu nan ta controla durante parada di carnaval,  nan no por garantisa cu e consumido lo por ta liber di intoxicacion, ya cu tin diferente factor cu ta hunga un rol. P’esey nan ta pidi pa bo ta alerta y controla bon e cuminda prome cu bo come. 

Control

Sra. Geerman a bisa cu e reglanan di higiena ta uno basico,  y p’esey tanto esun cu ta bende cuminda como e carnavalista mester ta consciente.  Ora cu un cuminda ta bira malo hopi factor ta hunga un rol ya sea higiena, temperatura, ora cu e cuminda ta keda afo pa basta tempo, wardamento di e cuminda, etc… Nan ta conseha pa no laga e cuminda afo mas cu dos ora largo, ya cu bo ta core risico. 

Sra. Geerman a menciona cu nan tarea como departamento di Salud Publico ta guia, controla, wak si tur cos ta bayendo bon direccion na momento cu nan ta controla.   Esaki ta e control debido cu nan a realisa durante e parada di Mucha y parada di Luz, caminda sra. Geerman a laga sa cu nan ta hopi satisfecho con consciente nos hendenan a cuminsa bira, specialmente esunnan cu ta bende cuminda na publico.

Sinembargo durante nan control nan a bin constata cinco luga cu no tabata cumpliendo debidamente cu reglanan di higiena.  Tres di nan no tabatin jug cu awa, y dos no tabatin habon, pero riba diadomingo el a bira practicamente completo por ta un di e tent di cuminda no tabatin habon.

Pa loke ta e carchi di salud of carchi berde mayoria di nan a cumpli cu nan, y esun cu no a cumpli cu tabata un so, si no por a sigui bende cuminda ya cu aunke e tabata cumpli cu regla di higiena, e mester cumpli cu ley tambe. “Ley ta bisa cu si no tin carchi di salud na ordo, bo no por bende cuminda”, sra. Geerman a bisa.

Tin poco cos fei di man cu por bay malo, ya cu esaki ta posibilidad cu tin di haber tambe, con bo situacion di salud ta, ya cu hende grandi ta mas vulnerabel. Un di e tipnan cu semper nan ta duna ta: Wak bon unda bo ta come y tipo di cuminda cu bo ta come. Tambe esun cu ta hiba cuminda pa wak carnaval percura hiba cuminda fresco sin mayonaise, no laga e cuminda hopi tempo para afo, hiba cantidad di awa, consumi e cuminda prome cu dos ora.  “Nan ta tipnan cu abo mes ta baha e riesgo pa bo bira malo”, el a bisa.