Sra. Trudy Hassel un persona hopi conoci den comunidad cu a traha di cerca cu hopi preso y tambe hopi hoben cu ta y tabata den problema cu a cay cera. Sra. Hasell pa e personanan aki, sea ta hombernan grandi y of hobennan cu a cay den man di husticia, semper a haya e consehonan cu e por a duna na cada un di nan.
E conocedo Juan Junior Blauw Quant tambe tabata den e grupo e tempo aya cu tabata haya guia y conseho di Sra. Hassel. Nos tur persona ta corda cu Sra. Hassel tabata motor di un proyecto grandi Lets Talk cu comerciantenan a sostene pa yuda e hobennan principalmente pa sali den e mundo di gang. Esaki tabata un proyecto exitoso y por a tuma nota tambe cu e problema di gang a keda pa pasado.
Sinembargo Sra. Hassel semper na momento cu e por duna un conseho y papia cu cualkier persona sea ta hende grandi of hoben e ta haci esaki cu tur bon intencion, nos tur ta ser humano na e mundo aki y nos tur mester di un sosten pa sigui laga nos den e caminda corecto.
Dia tabata e dia pa e ex detenido Juan Junior Blauw Quant sali Sra. Hassel a keda motiva e famia y a keda guia tras di cortina pa hunto nan sigui enfoca pa bay dilanti, ta actonan noble cu ta keda haci pa esun cu a cay cera no bolbe cay den tentacion y bolbe bek KIA. Na momento cu bo ta haci un acto noble e no mester di un show, e mester ta di bo curason pa e persona y famia. Den transcurso cu Juan Junior Blauw Quant tabata cera su mama tambe a fayece cu tambe ta situacionnan cu mester recupera heridonan. Actualmente Juan Junior Blauw Quant tin un bida completamente nobo, e la bira un persona completamente nobo y ta cristian hunto cu su pareha actual. Sra. Hasell ta lamenta cu den un medio di comunicacion ta tilda su persona di diferente asuntonan cu nada no ta cuadra cu berdad.
Segun Hassel cualkier medio di comunicacion si e ta traha den un modo profesional prome cu e saca informacion e mester busca pa sa si e informacion ta veredicto corecto si of no y no por cuminsa acusa personanan di cierto actonan cu e medio a trece padilanti cu absolutamente no ta basa riba ningun clase di berdad. segun Hassel
Ta berdad cu mi persona a bay KIA debi cu a compronde cu Juan Junior Blauw Quant lo a sali den libertad. Sra. Hassel pa varios aña a traha cu masha hopi detenido cu a haya nan mes envolvi den cierto actonan cu a hiba nan hopi leu, tur e añanan ey a purba keda duna conseho na e personanan aki pa nan no bay ripiti e actonan aki nunca mas y dia cu Juan Junior Blauw Quant a sali no tabata un excepcion.
Segun Sra.. Hassel tempo cu su persona tabata director di KIA a cuminsa cu proyectonan di resocialisacion y reintegracion di detenidonan pa asina na e momento cu nan recobra nan libertad nan por sali den nos sociedad na un forma cu nan no ta bay comete un otro actonan atrobe y e sociedad mes lo ricibi nan y yuda nan pa pasa dor di e proceso aki, y Juan Junior Blauw Quant tabata un di e personanan y hunto cune tabatin hopi mas detenido cu tabata ricibi conseho pa asina nan realisa cu locual cu a sosode no mester ripiti nunca mas, y cu e meta aki mi persona a dicidi di warda Juan Junior Blauw Quant sali for di KIA pa por papia un rato pa mustr’e cu locual cu a pasa den pasado mester lag’e den pasado y pa nunca mas e ripiti y cu awo cu e ta bay cuminsa un etapa nobo di su bida e lo mester sigui padilanti, esaki tabata e unico motibo cu mi persona a bay KIA pa por duna cierto palabranan debi cu tur persona tin e derecho di recobra nan bida den nos sociedad.
Sinembargo lamentablemente por a tuma nota cu e intencion a draai completamente diferente na e echo aki, a saca potret di mi auto y en bes di bati riba mi bentana manera un medio y periodista profesional mester ta , nan a dicidi di dies saca mi auto y cuminsa fabrica storia unda cu aparentemente lo mi persona tabatin un relacion amoroso cu e persona aki durante di mi estadia den KIA y door di esaki mi persona a bin KIA.
Sra. Hassel ta desmenti e insinuacionnan aki categoricamente y es mas mi persona lo cuminsa tuma pasonan legal pa asina e medio di comunicacion aki bay rectifica. Pa ta bon cla ami Trudy Hassel no ta acepta mas e insinuacionnan aki debi pa hopi aña mi mester a soporta hopi mentira , calumnianan cu e medio di prensa aki tabata publica contra di mi persona tanten cu nan no tabata basa riba ningun clase di berdad.
Trudy Hassel la kere firmemente cu a bira tempo pa prensa cuminsa asumi su responsabilidad y bira mas profesional. Na momento cu trece algo den prensa semper mester verifica e otro banda, semper mester duna e otro partido tambe e oportunidad pa expresa locual cu e tin di bisa. No por ta posibel cu ta saca un conclusion pensando cu abo como medio ta kere ta asina e ta of solamente pa mancha un hende su nomber of atacha su nomber.
Sra. Trudy Hassel ta duna di conoce cu hopi aña pasa e la dirigi su mes pa purba di yuda hobennan cu a bay den e mundo criminal. mi tabata yama nan e muchanan di Lets Talk y e añanan ey cu a traha hunto cu nan no tabata prome y no tabata ultimo tampoco cu basa riba mi experiencia propio mi a dicidi di extende mi ayudo na tur hende cu tabata bati na mi porta, y hopi hende a bati na mi porta pa ayudo y semper mi tabata habri pa yuda y awe esey no ta bay cambia tampoco. Sra. Trudy Hassel di su curason semper lo e sigui yuda tur hende paso mi persona ta kere tur persona cu a comete erornan den nan bida merece un di dos oportunidad. Si nos sociedad keto bay ta keda acusa e hendenan aki ora nan sali en bes di duna nan un man pa nan laga e pasado den pasado mi ta kere cu e cantidad di hende nan cu ta bira recidivista, o sea e hende nan cu ta bolbe bek KIA ta keda grandi. Nos tur como Aruba tin e responsabilidad como sociedad pa yuda e personanan aki mehora nan bida y realisa cu tin un otro manera di bida sin yega den criminalidad. Tambe mi persona ta kere firmemente cu esaki tambe ta un tarea pa ami como polis debi cu polis no ta solamente pa core tras di hende pa detene nan y tira nan den prizon. Polis su tarea tambe ta pa evita pa un persona yega asina leu cu e mester bay cera den KIA. Sra. Trudy Hassel ta lamenta profundamente cu ta dies draai henter e asunto aki pone den un direccion cu no mester a bay.
Mi ta pidi un y tur prome cu bo critica busca e otro banda di medaya y cada un di e personanan aki cu a comete erornan den nan bida nan merece un di dos oportunidad y duna nan e di dos oportunidad aki. Loke ta di lamenta cu den KIA mes no tin nada pa sigui yuda e presonan aki pa integra y na momento cu nan sali pa ta un miho hende den sociedad nan no ta logra esaki.
Nos tur hunto como un Aruba mester stop di tira dede riba hende y pone bo granito pa yuda esunnan cu tin e mas dificil pa un motibo of otro. Sinembargo e pasonan legal a cuminsa y ya caba a papia cu un hurista pa asina despues sigui cu e pasonan legal contra di e medio aki cu ta duna informacionnan incorecto y ta insinua cosnan cu no ta berdad riba mi persona, Sra. Trudy Hassel ta duna di conoce.
