Maduro hunto cu Croes y Tromp ta un di e famnan mas popular riba nos isla. E ciudadano y empresario sr. Raymond Maduro tabata na encargo di un tarea nada facil, esta busca e rais di e fam Maduro na Aruba.
E interes di e Maduronan tabata grandi durante un anochi cultural na Biblioteca Nacional Aruba su sede na Oranjestad relaciona cu Dia Internacional di Lenga Materno… Nan interes tabata basicamente pa sa e origen di nan fam y nan presencia riba e isla aki.
Entre nan tabatin presencia di parlamentario sra. Xiomara Ruiz-Maduro kende a sigui e presentacion di sr. Raymond Maduro cu hopi interes, mescos cu e otro Maduronan y publico en general. Un invitado di honor presente di e famia Maduro tabata sra. Anette Maduro, un señora di 106 aña, mama di 15 yiu, tur na bida y talbes e miembro di mas edad di e fam aki riba nos isla.
Investigacion
Sr. Raymond Maduro a bisa bon cla cu e no ta un investigado, tampoco un historiado, sino cu el a percura pa haci su huiswerk cu hopi seriedad y responsabilidad. El a haci su charla agradabel bisando cu e mester coba den hopi buki, papia cu hopi hende cu a yuda su persona pa e por haya mas historia di loke e mes no tabata sa. Un di e fuente cu el a consulta tabata sra. Digna Lacle Herrera kende tabatin informacion geneologico di e famia Maduro, pasobra un wela di dje tabata Maduro, e tabata Maria Francisca Maduro.
Den su disertacion riba e fam Maduro, sr. Raymond Maduro a bisa cu nan ta Hudiu Sefardita origina na Spaña y Portugal. Nan a wordo persigui y despues cori fei di e paisnan aki durante Inquisicion na 1468, tempo di Rey Fernando y Reina Isabela na Spaña cu tabata desea pa tur su ciudadanonan ta Catolico.
Pa haci e trabou aki el a bay 10 generacion atras di e fam Maduro. Y ta asina cu su antepasado welo Antonio Ruiz Maduro a wordo kima den un tempo cu el a cualifica di hopi cruel y hororoso. Un di e prome luga cu e Maduro a bay huyendo di Inquisicion tabata Hulanda y Francia. Fei di Hulanda a bin diferente famia Hudiu Sefardita entre nan Maduro pa nos region Caribe. Nan a bin Costa Rica, Panama, St. Thomas, Jamaica, Corsou, etc. Sr. Raymond Maduro a bisa cu su tata mes tabata Maduro di origen di Panama.
Presencia di Maduro nan na Aruba
Na 1670 e prome Maduro a yega na Corsou y nan tur ta descendiente di Salomon Maduro cu a nace na Amsterdam na 1629. E prome Maduro cu a yega Aruba a bin fei di Corsou; y e tabata Fancelmo Levy Maduro hunto cu su casa Ana Bruno na aña 1754.
Un anecdota cu sr. Raymond Maduro a conta cu ora el a bay consulta cu un fuente riba e diferencia cu ta existi entre e Maduro di Corsou y e Maduro di Aruba. Ora el a bay check, sr. Raymond a haya como contesta cu mientras e Maduro nan di Corsou a percura pa bira comerciante prospero y bankero prominente; esun di Aruba a percura pa trece yiu riba e mundo aki.
Pa cita un ehempel den su investigacion sr. Raymond Maduro a trece dilanti cu un di e yiunan di Fancelmo Levy Maduro, esta Isaac Maduro a casa cu Johanna Catherine Croes di Aruba y nan a haya 8 yiu.
“Manera m’a bisa e Maduro nan aparentemente tabata hopi fertil… y ta ainda”. E comentario aki a cay den bon tera cerca e publico presente cu a cuminsa hari di biaha.
