Un punto relevante cu Sr. Jan van Nes di Aruba Food & Beverage Association a bin pone hopi atencion riba dje ta e fenomeno conoci como red tape. E burocracia y tardansa den e servicio cu gobierno cu ta limita te hasta pega cu un proceso por bay mas lihe pa e wordo concretisa.
E parti di mehoracion, eficiencia y agilisacion di gobierno su servicio ta encabesa e lista di 8 punto di atencion cu Prome Minister, Evelyn Wever-Croes a anuncia durante e reunion cu a tuma cu sindicatonan y gremionan, diaranson.
Sr. Van Nes ta kere cu red tape mester bira red carpet. E ta haya cu nos mester por trece solucion riba e parti aki pa stimula economia. Pero gobierno mester por tambe di duna mucho mas servicio y agilisa procesonan.
El a bisa cu e asunto aki ta documenta, caminda diferente task force a sinta hunto pa percura cu nos economia por bay dilanti. Pero pa logra esaki “nos tin cu corta e red tape”, segun Sr. Van Nes.
E ta spera cu tur e task forcenan, ora cu nan ta entrega tur nan documentonan, e lo por keda cla, pa asina e por bira e yabi pa stimula nos economia.
