Despues di un proceso extenso y riguroso pa yega na e persona cu lo tuma e responsabilidad di dirigi e compania estatal Arubus NV, awe Minister di Transporte, Chris Romero, a anuncia oficialmente cu e director nobo a keda den persona di Edwin Mohamed.
Hunta di Comisario di Arubus, cumpliendo cu e deseo di Romero, a apunta un compania internacional specialisa pa realisa e proceso di escogencia di e director nobo di Arubus NV. Tabatin un cantidad considerabel di persona cu a aplica, di cual a scoge 11 candidato na prome instante. Despues di a pasa den e proceso di revision cu mester a cumpli cu e exigencianan di e Hunta di Comisario di Arubus NV, finalmente a yega na sr. Edwin Mohamed como esun capacita pa e funcion di Director di dicho compania.
Mohamed tin un Bachelor’s Degree den e area di Applied Electrical & Electronic Engineering. El a caba su estudio na Saxion Hoge School, Enschede. Actualmente Mohamed ta completando su Master’s Degree den Business Administration na Universidad di Aruba.
Pa e ultimo 17 aña, Mohamed a labora na nos compania nacional di telecomunicacion, Setar NV. Ultimamente Mohamed a desempeña na Setar como hefe di e departamento di Business Telecommunication System (BTS).
Mohamed a asumi e reto como Director di Arubus NV, y a compromete su mes di sanea e situacion financiero y mehora e servicio di e compania, manteniendo semper como prioridad e bienestar y necesidad di su usuarionan. E enfoke principal aworaki ta pa duna e compania estatal di transporte un cara nobo, y pa cu esaki lo bin cu cambionan den e flota di bus y demas ekiponan cu lo wordo modernisa.
E titular di e cartera di Transporte, Minister Chris Romero, a duna Edwin Mohamed un caluroso bon bini como director di Arubus NV.
