Mediante un comuniucado di prensa, gobierno di Aruba a comparti e noticia cu siman pasa, Rendolf (Andy) A. Lee a huramenta dilanti di Rey Willem Alexander na Paleis Noordeinde como miembro di Raad van State pa Aruba.
Sr. Lee ta bira sucesor di Sra. Milly Shwengle, kende a ocupa e funcion aki durante ultimo seis aña, durante cual el a sa di representa Aruba dignamente y segun gobierno di Aruba a indica, a haci un excelente trabao.
Representantenan di un comision independiente a scoge pa recomenda Sr. Lee pa representa Aruba den Raad van State basa riba su trayectoria profesional amplio, y basa riba e recomendacion, Conseho di Minister di Reino a aproba e nombramento durante nan reunion dia 24 di november ultimo. Sr. Lee ta un politicologo cu mas di 30 aña di experiencia den sector publico y semi-publico na Aruba, Corsou y Washington, Director di CBS Aruba, y Gerente di Departamento di Investigacion di Banco Centraal Aruba. Tambe e tabata miembro y presidente di Parlamento entre 2009 y 2010. Despues el a fungi como Minister Plenipotenciario na Washington pa Aruba y tawata consehero di Prome Minister entre 2018 y 2020.
Despues di su huramentacion diaranson ultimo, Sr. Lee a cuminsa traha inmediatamente den Raad van State pa Aruba. Ta desea Sr. Lee hopi exito den su funcion representando nos isla.
