Telefon pa Hubentud a introduci un proyecto di sportsgedragscode pa clubnan deportivo. Segun nan ta informa, esaki no ta reglanan nobo y mas bien lo yuda mehora comportacion rond actividadnan deportivo.

Manera Bon Dia Aruba a yega di publica, tur aña Telefon pa Hubentud ta bin cu un top cinco di e topiconan cu nan ta haya via di telefon. Tur aña nan ta haya entre 2.000 pa 3.000 yamada anto di esey nan ta traha un top cinco cu e preguntanan cu ta bini mas dilanti. Segun trahado social di Telefon Pa Hubentud Shurman Milliard, nan a ripara cu dos/tres aña pasa caba nan a wak algun problema den e mundo di deporte.

Via telefon y social media entre otro por a ripara e comportacion y wak bringamento ta bini mas dilanti rond di e mundo di deporte cu no tin nada di haber cu e sport mes. P’esey a scoge pa bini cu e proyecto Sportsgedragscode segun sr. Milliard.

Proyecto traha mas crioyo pa Aruba
Telefon pa Hubentud a acudi cerca IPA unda tin hoben y adultonan caba cu ta activo den e mundo deportivo y nan sa mas di esaki aki na Aruba. Hunto cu nan, Telefon pa Hubentud a scoge un proyecto cu a logra na diferente caminda na mundo caba segun sr. Milliard y traha esaki mas crioyo pa e fit na Aruba.

Asina a scoge pa bay na Arubaanse Voetbal Bond y diferente gym tambe pa asina ofrece e proyecto aki. E proyecto ta pa tur e factornan den e mundo deportivo pa e hobennan y adultonan den e club cu ta haci e deporte, e sportclub mes y trainers pasobra nan ta un parti hopi importante segun Telefon pa Hubentud. “Nos a bin cu diferente reglanan, puntonan y comportacion cu nos ta kere por crece y bira mas bon. Anto pa esey nos a pone diferente puntonan riba papel. E sportsclubs por tuma esaki como un richtlijn nobo den nan sport pa asina nan por yuda e hobennan y otronan cu ta participa den e sport ey mas bon,” sr. Milliard ta bisa.

Placer den sport
Por ehempel, Telefon pa Hubentud ta wak si bo ta un trainer of sportclub, abo mester percura pa tin siguridad rond di bo veld pa e hendenan cu ta practica e sport haci e na un manera safe. Pues manera un trainer pa revisa entre otro si no tin glas of cosnan ta stroba, of pa e fanaticonan no grita cosnan horibel cu ta kibra animo di e muchanan. “Esey ta un cos cu e sportclub mes mester cumpli cu ne pasobra esey ta e mundo deportivo di e hoben.”

Si wak na e hoben mes, nan tambe tin un deber of un cos cu nan mester haci. Nan mester ta responsabel segun sr. Milliard ta splica nos, nan mester ta bon cuida y carga tur ora e ambiente di wega pa otronan cu ta haci e sport. “E ta bon cu e muchanan ta gana pero e cos mas principal ta e orguyo of con contento nan ta bira ora di practica e deporte. Esey mester ta e cos mas importante y no djis haci tur cos pa gana.”

Reglanan
Telefon pa Hubentud a bin cu reglanan (9 reglanan di oro) cu ta hopi facil y claramente poni riba papel segun nan ta bisa Bon Dia. Eigenlijk tur e teamnan ta riba mesun liña caba cu esakinan no ta realmente reglanan nobo.

“Por ehempel pa bin cinco minuut prome cu un training cuminsa, algo hopi facil cu mester pasa di su mes caba,” sr. Milliard ta splica. Otro ehempel ta si bo mayornan ta bin, pa nan no bebe alcohol den of cerca di e veld. E hobennan mes a realisa pues cu e reglanan aki ta locual tabata tin caba.

“Nos ta wak cu hende ta kibra e reglanan aki si, pero e reglanan ta bin hopi visual den e sport unda cu nan ta haya un sticker of un borchi cu tur e reglanan bao di otro.Ningun keho a bin dilanti riba e reglanan aki, al contrario e deportistanan a apoya y kere den esaki segun Telefon pa Hubentud. Nos ta bay wak tambe cu e comportacion di e fanaticonan, otro teamnan y trainernan tambe lo bira mas bon pa asina e hoben practica su deporte hasta mas bon den nos comunidad.”