Aunke 14 aña pasa, Papiamento a wordo introduci como lenga oficial cu e mesun igualdad cu Hulandes, ainda parlamento no a aproba e ley pa duna bida legal na oficialisacion di un ortografia di Papiamento.

E  caminda pa e ley di ortografia di Papiamento a bira uno largo y nada facil, teniendo na cuenta tambe e conceptonan y opinionnan di e linguistanan riba e tereno aki.  Despues di permanece un temporada largo na Departamento di Asuntonan Huridico, parlamentario Jeffrey Kelly (AVP) hunto cu su colega di fraccion Christian Dammers a rescata e concepto di ley aki conoci como Landsverordening schrijfwijze Papiamento pa e por yega finalmente parlamento luna di maart ultimo.

Contenido di e ley
E parlamentario Kelly ta bisa cu e ley aki su mes ta “hopi simpel”.  E concepto di ley ta splica tur e proceso pa yega na un ortografia oficial for di cu Aruba a forma parti di Antia Hulandes te cu awor cu nos Status Aparte.

“E tempo ey a cuminsa pa nos oficialisa nos tipo di Papiamento. Nos sa cu na otro islanan den reino tin otro tipo di Papiamento ta wordo  papia y skirbi.”

Tambe e ley ta contene e reglanan di skirbimento of ortografia di Papiamento. E reglanan aki  ta e compilacion di e trabou realisa pa diferente gruponan di trabou durante varios aña, entre otro e linguista Ramon Todd-Dandaré, Joyce Pereira, pero tin hopi mas.

Lo reemplasa buki blauw
E ley tambe tin un lista di palabra. Actualmente tin e famoso “buki blauw” cu tin un lista di palabra di nos vocabulario di Papiamento. Pero den e ley cu lo wordo trata den parlamento ta splica cu e buki blauw no ta  mas vigente, pasobra lo bin cu un buki nobo cu gobierno lo cubri e costo di su produccion. E ta un lista di palabra basta largo.

Parlamentario Kelly ta declara na e matutino aki, cu ora e mes a pasa den e ley aki, y el a wordo confronta cu e lista di palabra, bo mes ta siña di dje. “Ami mes cu ta di profesion di maestro di Hulandes, Ingles y Spaño, bo ta kere cu bo ta conoce bo idioma bon. Pero ora bo mira e lista di palabra, bo  ta bisa: M’a pensa cu nan ta skirbi e palabra asina, pero e no ta wordo skirbi asina.”

Procedura den Parlamento
Ya caba el a cuminsa cana su caminda regular prome entre otro Comision Central di Staten a fiha un fecha pa entrega e preguntanan concerni cu e ley aki. Di banda di fraccion di AVP a dicidi di haci e pregunta durante e reunion publico; mientras otro fraccionnan a dicidi di haci nan preguntanan na escrito.

Diabierna ultimo tabata e ultimo dia pa entrega e preguntanan y awor parlamento ta na espera di e contesta di parti di gobierno. Despues e turno lo ta pa presidente di parlamento pa fiha un fecha pa bin cu e reunion publico pa trata e ley aki cu lo duna otro dimension historico na nos lenga materno.

Aunke presidente di parlamento ta esun cu ta fiha e fecha, e ta spera cu  prome cu juli e  concepto di ley aki lo wordo trata. Pero no mester lubida cu nos ta den un temporada di campaña den cuadro di eleccion proximo di dia 22 di september venidero;  y mas cerca e fecha aki ta, menos tempo y reunion lo bay tin den parlamento. Ademas  parlamento ta bay cu reces dia 9 di juli awor.

 

Diferente discusion riba ortografia
Parlamentario Kelly ta bisa Bon Dia Aruba cu tabatin diferente discusion prome cu e ley a keda presenta de nos organo legislativo. E debate aki tabata entre diferente grupo cu tabata pusha riba e tipo di ortografia di Papiamento. Tabata un  grupo cu tabata pusha pa un Papiamento mas parecido na Spaño, tambe esun cu tabata pro di un ortografia etimologico y un ortografia fonetico, etc.. “Finalmente e meta tabata pa bin cu un ley cu tabata oficialisa skirbimento di Papiamento.” E meta su tras ta esun di trece un uniformidad den e uzo di skirbimento di Papiamento.

Parlamentario Kelly ta un docente di idioma y e ta kere cu esun cu ta stima Papiamento lo ta pro di oficialisacion di ortografia, pasobra bo kier cu nos lenga ta wordo skirbi corectamente. Mientras cu den nos comunidad ainda tin confusion pa skirbimento di Papiamento. Pa nan como parlamentario cu ta skirbi articulo pa pueblo, e ta haya cu no tin nada mas miho cu ora cu nan ta manda nan articulonan pa e medionan di comunicacion, nan no mester pasa henter dia ta coregi nan. Ya cu e ta skirbi den un Papiamento manera cu e mester wordo skirbi den un forma uniforma.

Historia ortografico
E ortografia cu nos conoce ta data di 1976 y p’esey ta bin cu cierto adaptacionnan pa establece un ortografia nobo di Papiamento. Na 1976 Eilandsraad di Aruba e tempo ey a tuma e decision pa establece e ortografia di Papiamento. Na 1986 ora cu Aruba a drenta su Status Aparte e decision aki a wordo adopta via un Algemene overgangsregeling wetgeving en bestuur como Landsverordening schrijfwijze Papiamentse taal.

Na 1992 un comision a wordo apunta pa amplia e reglanan di ortografia di Papiamento y trece mas claridad y simplicidad den e idioma Papiamento cu e meta final di trece uniformidad, o sea pa stimula tur hende pa skirbi Papiamento uzando e mesun ortografia.